Aik anchal say bandha hai sub kuch
aik tasweer
aur tasweer pe bheegay huay hont
aik sandal ki unabi pencil
aik be rabt sa ukhra hua khat
aik adad card
jiss ko chonay say teri yaad chali ayi hai
aur iss card me rakhi hui ikloti palk
jiss say manoos duaon ki mehek ati hai
kisi gumnam say shayir ka adhora misra
kisi pazaib say bichra hua ujla moti
aik murjhayi hui zard chanbeli ki kali
jiss me ab bhi ter zulfon k bhanwar liptay hain
aik boseeda question paper
jiss k konay pe likha naam ab bhi taaza hai
sharbati kanch ki tooti hui nazuk chori
aik toota hua halka sa gulabi nakhun
aik gadla sa tissue paper bhi
jiss pe mehkay huay ashkon k nishan zinda hain
yehe daoulat hai yehe kuch hai asasa mera
aik anchal say bandha hai sub kuch
hasraton,siskyon, aahoon me samaita anchal
tere khushbo,meray ashkoon me lapaita anchal
AIK ANCHAL SAY BANDHA HAI SUB KUCH
AIK BHEEGAY HUAY ANCHAL SAY BANDHA HAI SUB KUCH