souchta hoon ki mohabat se kinara kar loon
dil ko begaana-e-tarhgeeb-o-tamanna kar loon
souchta hoon ki mohabat hai janoon-e-ruswaa
chund bekaar se behuda khayaalon ka hajoom
aik azaad ko paaband banane ki hawas
aik begaane ko apnaane ki saii -e-mauhoom
Souchta hoon ki mohabat hai suroor-e-masti
iss ki tanveer mein roshan hai fazaa-e-hasti
souchta hoon ki mohabat hai bashar ki fitrat
iss ka mit jaana, mitaa denaa bohat mushkil hai
souchta hoon ki mohabat se hai taabinda hayaat
aap ye shamma bujhaa denaa bohat mushkil hai
Souchta hoon ki mohabat pe karhi shartein hain
aik tamaddun mein masarrat pe barhi shartein hain
Tumhe udaas si pata hoon mein kaee din se
na jaane konse sadme utha rahi ho tum
wo shoqhiyan wo tabassum wo qah-qahe na rahe
her aik cheez ko hasrat se dekhti ho tum
chupa chupa ke khamoshi mein apni bechaini
khud apne raaz ki tasheer ban gaee ho tum
Mujhe tumhare taghaful se kyun shikayat ho
meri fanaa mere ehsaas ka taqazaa hai
main jaanta hoon ke dunya ka khauf hai tum ko
yahaan hayaat ke parde mein maut chalti hai
shikast saaz ki awaaz mein ruuh naghma hai
Mujhe tumhari judaee ka koee ranj naheen
mere khayaal ki duniya mein mere paas ho tum
ye tumne theek kaha hai tumhein mila na karoon
magar mujhe bataa do ki kyun udaas ho tum
khafa na ho meri jurrat-e-khitaab per
tumhein khabar hae meri zindagi ki aas ho tum
Mera to kuch bhi nahi hai mein ro ke jee loonga
magar khuda ke liye tum aseer-e-gham na raho
huwa hi kya jo zamaane ne tum ko cheen liya
yahan per kaun huwa hai kisi ka soucho to
tujhe qasam hai meri dukh bhari jawani ki
main khush hoon meri mohabat ke phool thukra do
main apni ruuh ki her aik khushi mita loonga
magar tumhari masarrat mitaa nahi sakta
main khud ko maut ke haathon mein sou'np sakta hoon
magar ye baar-e-masaaib utha nahi sakta
tumhaare gham ke siwa aur bhi to gham hai mujhe
nijaat jin se main aik lahzaa pa nahi sakta