Long ago I posted a long nazm on GS of which, two parts are beign reproduced here. Please excuse me this reprodcution. I hope you bear with me.
Soch-dar-soch
(i)
Mujhey mohabbat ke tilisam-qadey sey merey hamdam nijaat dey do
ke waqt ki dehleez pey betthey betthey, tumhaara rasta taktey taktey
meri nigaahoN ki putlioN pey salwatteiN si parr gai heiN
tumhaarey dikhaaey sabz saraaboN ke zaavioN ko baaham milaatey
merey khaaboN ke silsiloN ke taaney baaney bikhar gaye heiN
khayaaloN ki ruheiN ujarr gai heN, ruh ki tanaabeN ukharr gai heiN
meri tammannaoN key aainey bohat si kirchioN meiN bat gaey heiN
jo deeye jala key ummeed ke tum merey haathoN meiN rakh gaye they
aaj un diyoN ki roshni ko shadeed khatra hey aaNdhioN sey!
(ii)
Wo darakht saarey jo gawah baney they tumhaari meri chaahtoN ke
wo saarey rastey jinhey thi aadat hamaarey qadmoN ki aahatoN ki
wo paa key mujh ko tanha akela ajeeb nazroN sey dekhtey heiN
aur lakrrioN aur patharoN ke kaamosh shaahid ye poochtey heiN
ke kahaaN gaya wo tera hamdam jis ney hamey gawah bana kar
umr-e-rawaaN ke saarey rastoN pe saath chalney ki baat ki thi!
terey saath jeeney ki baat ki, thi terey saath marney ki baat ki thi
kahaN gaya wo “wafa ka pekar,” tum aaj tanha kiuN phir rahey ho!
meiN kesey keh duN wo “wafa ka pekar” apney rastey badal gaya hey!
By: Amal
