SAMINA RAJA
SAMINA RAJA
SAMINA RAJA
SAMINA RAJA
SAMINA RAJA
**
دل میں چھپی ہوئی تھی جو، زینتِ بام ہو گئی
آنکھ اٹھی تو ساری بات بر سرِ عام ہو گئی
ایک رفیق تھا سو دل اب ترا دوست ہو گیا
جو بھی متاع ِ خواب تھی سب ترے نام ہو گئی
دیکھا نہیں ہے آفتاب، نصف نہار پر کبھی
عرصہء زندگی میں بس صبح سے شام ہو گئی
خواہشِ ِ ناتمام کو پیش ِ زمانہ جب کِیا
رم ہی کبھی کِیا نہ تھا، اِس طرح رام ہو گئی
شام کے راستے پہ تھا ایک خیال ہم رکاب
پھر تو ہَوا بھی ساتھ ساتھ محو ِ خرام ہو گئی
کیسی اڑان کی ہمیں تجھ سے امید تھی مگر
زندگی! تُو بھی طالبِ دانہ و دام ہو گئی
کلفت ِ جاں سے ایک ہی ساعتِ خوش بچائی تھی
اور وہ نذر ِ گردش ِ ساغر و جام ہو گئی
میں نہ جھپک سکی پلک مجھ پہ جھکا تھا جب فلک
حد سے بڑھی تو خامشی، خود ہی کلام ہو گئی
شہر میں ان کے نام کے چند چراغ جل اٹھے
راہروان ِ شوق کو دشت میں شام ہو گئی
**
**
کار ِدنیا میں کچھ اے دل نہیں بہتر تو بھی
کوچہء عشق سے چن لایا ہے کنکر تو بھی
جب تلک بام ِ فلک پر ہے، ستارہ توُ ہے
اور اگر ٹوٹ کے گِر جائے تو پتھر تو بھی
یہ قناعت بھی محبت کی عطا ہے ورنہ
شہر میں اور بہت، ایک گداگر تو بھی
مرے اندازے سے کچھ بڑھ کے تھی ظالم دنیا
پاؤں رکھ ، راہ ِ تمنا پہ سنبھل کر تو بھی
اجنبی لگتا ہے کیوں عالم ِ بیداری مجھے
کہیں رہتا ہے مرے خواب کے اندر تو بھی
میں اسُی موڑ پہ منزل کی طلب چھوڑ آئی
ہو لیا جب سے مرے ساتھ سفر پر تو بھی
میں کرن وار شبِ ماہ میں تجھ پر اتری
موج در موج اٹھا، بن کے سمندر تو بھی
مانگنا بھول گئی میں تو تمنا کا صلہ
دوجہاں سامنے پھیلے تھے، برابر تو بھی
**
Re: SAMINA RAJA-POETRY-SAMINA RAJA
Lunba G buhat achi sha'ri aap nay share key ... .buhat lutaf aaya parh kar leekan agar aap aik din mein do do kar kay sub kay sath share karti to ziyada lutaf aata ........
anyway buhat achi sharing and keep it up