**Sakhawat Ka Namood-Afrooz, Manzar Hi Nahi Aaya
Sakhi Bethay Rahay, Koi, Gada’gar Hi Nahi Aaya
Ye Soocha Tha Teri Khaatir, Koi Moti Nikalon Ga
Main Jis Rastey Mein Tha Is Mein, Samandar Hi Nahi Aaya
Pahan Kar Aainay Phirti Rahi Dewaangi Apni
Tamana Thi Bohat Jis Ki Wo Pather Hi Nahi Aaya
Baharein, Bailain, Jharay Patay, Lagay Jaalay Dareechon Par
Makeen Aisa Gaya Ghar Se Palat Kar Hi Nahi Aaya
Chamak Jis Ki Bula Laiti Uqaabon Ko Nasheman Se
Fizaaon Mein Koi Aisa Kabooter Hi Nahi Aaya
Dafenoon Ki Tarha Dil Mein Khazanay Rah Gaye Saaray
Samandar Kya Karay, Koi, Shanawar Hi Nahi Aaya
Diya Hi Jab Nahi Ho Ga Hawa Kis Ko Bhujaey Gi
Chiraag-E-Rah, Main Ab K, Jala Kar Hi Nahi Aaya**
