mein tera shehr chor jaoonga
is se pehlay k ghar k pardo’n se
tedi patloon koi silwa loon
is se pehlay k tujhko day kar dil
tere koochay mein khud ko pitwa loon
is se pehlay k teri furqat mein
khud-kushi ki scheme apna loon
is se pehlay k ek teri khaatir
naam ghundo’n mein apna likhwa loon
mein tera shehr chor jaoonga
is se pehlay k wo aduu kam-bakht
tere ghar ja k chughliaa’n khaey
is se pehlay k dein rapat ja kar
tere mere shareef hamsaaey
is se pehlay k teri farmaaish
mujh se chori k jurm karwaaey
is se pehlay k apna thaanedaar
murgh, thaanay mein mujhko banwaaey
mein tera shehr chor jaoonga
tujhko aagah kyoun na kar doon mein
apnay is intezaam se pehlay
mashwara bhi tujhi se karna hai
apni marg-e-haraam se pehlay
koi aesi train batla day
jaey jo tez-gaam se pehlay
aaj k is dinnar ko bhugta kar
kal kisi waqt shaam se pehlay
mein tera shehr chor jaoonga
mein tera shehr chor jaoonga … !