safar meñ dhuup to hogī jo chal sako to chalo
sabhī haiñ bhiiḌ meñ tum bhī nikal sako to chalo
kisī ke vāste rāheñ kahāñ badaltī haiñ
tum apne aap ko ḳhud hī badal sako to chalo
yahāñ kisī ko koī rāsta nahīñ detā
mujhe girā ke agar tum sambhal sako to chalo
kahīñ nahīñ koī sūraj dhuāñ dhuāñ hai fazā
ḳhud apne aap se bāhar nikal sako to chalo
yahī hai zindagī kuchh ḳhvāb chand ummīdeñ
inhīñ khilaunoñ se tum bhī bahal sako to chalo