aadaab dosto!
mahfil meN maashaa-allaah Khuub raunaq hai, aur dil chaah rahaa hai ki aap kii Khidmat meN kuchh aur pesh kiyaa jaaye. liijiye ek Ghazal haazir hai. mulaahizah farmaaiye aur apnii raae se navaaziye.
**qismat se jo milaa thaa mujhe do ghaRii kaa vaqt
kaise kaTaa, na puuchh, mirii zindagiii kaa vaqt!
baRhtii hai aur shiddat-e-takleef sau gunaa
aataa hai jab bhii yaad GhamoN meN Khushii kaa vaqt
dar dar bhaTak rahaa huuN vafaa kii talaash meN
dunyaa dikhaa rahaa hai ye aavaaragii kaa vaqt
kam hai tamaam umr nibhaane ko dostii
miltaa hai kaise aap ko phir dushmanii kaa vaqt?
saayaa bhii saath chhoR ke gum ho gayaa kahiiN
aayaa hai jab kabhii bhii buraa aadmii ka vaqt
laazim hai choT khaa ke javaaN.mard phir uThe
koshish kaa hai, nahiiN hai ye afsurdagii kaa vaqt
sab kuchh Khudaa ke fazl se hai aaj mere paas
maiN bhuultaa nahiiN huuN magar muflisii kaa vaqt
itraa na apne maal-o-zar-o-jaaidaad par
rahtaa nahiin hai ek saa hargiz kisii ka vaqt
ham mast-e-ishq the to Gham-e-zindagii na thaa
ai kaash! lauT aaye vahii beKhudii kaa vaqt
phir vo tasavvuraat meN jalvah-numaa hue
“Waseem” uThaao, huaa shaa’irii kaa vaqt !!!**
**WASEEM AHMED**
