**Qariya-e-jaan mein koi phool khilaane aaye
Woh mere dil pe naya zakhm lagaane aaye
Mere weraan dareechon mein bhi khushbu jaagey
Woh mere ghar ke dar-o-baam sajaane aaye
Us se ik baar to roothoon main ussi ki maanind
Aur meri tarah se woh mujhko manaane aaye
Issi koochey mein kayi uske shanasa bhi to hain
Woh kisi aur se milne ke bahaane aaye
Ab na poochoongi main khoye huye khabon ka pata
Woh agar aaye to kuch bhi na bataane aaye
Zabt ki sheher panahon ki, mere maalik khair
Ghum ka sailaab agar mujhko bahaane aaye !!**