**Pyaar ke deep jalaaney waaley kuch kuch pagal hotey heiN
apni jaan sey jaaney waaley kuch kuch pagal hotey heiN
hijr ke gehrey zakhm miley to mujh ko ye ehsaas huwa
pagal ko samjhaaney waaley kuch kuch pagal hotey heiN
jaan sey pyaarey logoN sey kuch kuch pardah laazim hey
saari baat bataaney waaley kuch kuch pagal hotey heiN
khaaboN meiN bhi pia-milan ke sapney deikhtey rehtey heiN
neendoN meiN muskaaney waaley kuch kuch pagal hotey heiN
is jhooti nagri meiN hum ney yehi hamesha deikha hey
sachi baat bataaney waaley kuch kuch pagal hotey heiN
pyaar jinhey ho jaey unko chein bhala kab mil paata hey!
shab bhar ashq bahaaney waaley kuch kuch pagal hotey heiN
apni zaat ke ujrrey gulshan se wo pyaar kahaN kartey heiN!
auroN ko mehkaaney waaley kuch kuch pagal hotey heiN
us ke ishq meiN bheeg ke Wasiq hum ko ye ehsaas huwa
dil ki baat meiN aaney waaley kuch kuch pagal hotey heiN
**