Re: Poet of The Month.. ADEEM HASHMI..
Pehle To Dil Wafa Se Bhi Agay Nikal Gaya
Phir Dil Iss Inteha Se Bhi Agay Nikal Gaya
Awaz De Ker Uss Ko Bulaon Main Kis Tarah
Wo To Hadd-E-Sada Se Bhi Agay Nikal Gaya
Nikli Hai Rooh Noor Ki Raftaar Se Bhi Taiz
Pal Main Koi Khala Se Bhi Agay Nikal Gaya
Kion Dar’ba’dar Ura’ay Phiray Khaak Ko Hawa
Abb To Badan Fanaa Se Bhi Agay Nikal Gaya
Ik Teer Tha Kamaan-E-Takhayyul Main Dair Se
Nikla To Wo Khuda Se Bhi Agay Nikal Gaya
Saansain Adeem Aakhri Lamhay Main Dhoondta
Main Koocha-E-Hawa Se Bhi Agay Nikal Gaya
Tuu Le Ker Aa Gaya Hai Dawa Kis Leay Adeem
Bemaar To Dawa Se Bhi Agay Nikal Gaya
Re: Poet of The Month.. ADEEM HASHMI..
Gham Ki Dukaan Khol Ke Betha Hua Tha Main
Aansu Nikal Paray Hain Khareedaar Dekh Ker
Re: Poet of The Month.. ADEEM HASHMI..
Khaak Per Jab Bikher Gaye Aansu
Ye Laga Jese Merr Gaye Aansu
Aaj Palko’n Ki Baar Phaand Gaye
Aaj Hadd Se Guzar Gaye Aansu
Aasmaan Bhar Gaya Sitaron Se
Gham Ki Jholi Main Bhar Gaye Aansu
Dil Ki Gathri Main Baandh Rakhay Thay
Janay Kese Bikher Gaye Aansu
Apne Gham Ki Kasafatain Theen Buhat
Uss Ke Gham Se Nikhar Gaye Aansu
Aaj To Gham Buhat Zyada Hai
Aaj Janay Kidher Gaye Aansu
Zabt Se Ehed Baandh Rakha Tha
Aur Phir Bhi Bikher Gaye Aansu
Sail-E-Darya To Kuch Nahi Tha Adeem
Apne Toofa’n Se Darr Gaye Aansu
Dil Kara To Buhat Kia Tha Adeem
Waqt-E-Rukhsat Bikher Gaye Aansu
Re: Poet of The Month.. ADEEM HASHMI..
Tum Ji Ke Dekh Lo Ke Yahan Mer Ke Dekh Lo
Ik Bay’hisi Hai Kuch Bhi Yahan Ker Ke Dekh Lo
Kese Hain Log Unki Tumhain Kia Misaal Doon
Jakay Mujassimay Kaheen Pathar Ke Dekh Lo
Saara Jahaan Tumko Daraye Ga Raat Din
Ek Baar Tum Kisi Se Zara Darr Ke Dekh Lo
Hamdardion Ka Bhaid Abhi Jaan Jao Ge
Chhoti Si Aik Aah Zara Bhar Ke Dekh Lo
Uss Ka Haseen Saath Kahan Aur Main Kahan
Ye Khel Bhi Adeem Muqaddar Ke Dekh Lo
Dedaar Ki Adeem Kahan Inteha Koi
Bus Aaj Ke Leay Usay Ji Bhar Ke Dekh Lo
Re: Poet of The Month.. ADEEM HASHMI..
Aik Muun Boli Beti Ka Dukh..
Baba!
Tum Kese Baba Ho
Tum Ne Mujh Se Apna Ghar Aabaad Kia Hai
Main Jo Tumhari Beti Hoon To Mera Ghar Aabaad Karo
Meri Sakhiaan Saathi Saari
Apne Apne Ghar Bethi Hain
Meray Leay Kion Abb Tak Meray Baap Ka Ghar Hai
Baap Ka Darja Apna Lekin (Babul Ka Ghar Pyara Lekin)
Suna Hai Koi Jewan Saathi Bhi Hota Hai
Meri Sakhian Saathi Mujh Ko Ye Kehti Hain
Aik Saheli Aur Hamari Aisi Thi Jo Kisi Ki Muun Boli Beti Thi
Uss Ko Muun Bola Baap Ne Theek Ghari Aabaad Kia Tha
Jewan Saathi Saath Dia Tha
Uss Ke Hath Main Hath Dia Tha
Baba Mujh Ko Hath Tumhara Kab Tak Thaam Ke Chalna Hoga?
Kab Tak Mujh Ko Apni Aag Main Jalna Hoga?
Main To Muun Boli Beti Hoon
Mera Koi Rishta Kesa, Mera Koi Naata Kesa?
Mera Dukh To Mera Dukh Hai
Apna Baap Jo Hota, Meray Dukh Ko Wohi Samajhta
Tum To Sukh Ke Saathi Ho Na
Meray Jitney Sukh Thay Tum Ne Saray Apne Naam Keay Hain
Baba! Main Kesi Beti Hoon
Pehle Mera Baap Mara To Mainay Aik Yateemi Dekhi
Abb Jab Tum Bhi Merr Jao To,
Main Doosri Baar Bhi Sirf Yateemi Dekhon?
Kia Meri Qismat Main Yehi Hai?
Meray Naseeb Main Hijr Ki Gharya’n He Likhi Hain
Wasl Ki Koi Raat Nahi Hai!
Meray Naseeb Main Jewan Saathi Naam Ka Koi Saath Nahi Hai?
Tum Ne Funa Ka Aur Funoon Ka Zewar To Bakhsha Hai
Main Ek Beti Bhi Hoon Baba,
Mujh Ko Dulhan Ban’nay Ka Bhi Zewar Bakhsho
Baap Jahaiz Dia Kertay Hain
Tum Ne Sher-O-Sha’oor Dia Hai
Nazmain Di Hain Ghazlain Di Hain
Aik Risaala Bhi Bakhsha Hai
Apna Naam Aur Apna Hawala Bhi Bakhsha Hai
Iss Ka Koi Mol Nahi Hai
Ye Anmol Khazanay Lekin!
Ye Sab Meray Jewan Saathi Kahan Banain Ge
Aaj Bata Do Mujh Ko Baba!
Mera Tumhara Kia Rishta Hai
Jab Tak Mujh Ko Jeena Hai Kia Baap Ke Ghar Main Jeena Hai?
Jewan Saathi Aur Sahara
Apna Beta Jo Hai Tumhara
Wo Jo Tumhara Waaris Bhi Hai
Aur Burhapay Main Jo Tumhari Dhaaras Bhi Hai
Apni Tumhari Beti Jo Hai
Wo Jo Apne Ghar Basti Hai
Uss Ko Dekh Ke Bhi Kia Tum Ko
Mujh Per Rehem Nahi Aata Hai?
..
Re: Poet of The Month.. ADEEM HASHMI..
Salaam
Aray yaar plz koi khushi wali Ghazal b koi post kar 2 har taraf dukh aur matam he kyun phila rakha hai :(
Re: Poet of The Month.. ADEEM HASHMI..
aray nokia jee.. aap ne sun rakha hoga k poetry of sorrow is true poetry.. 
Adeem Hashmi Ke Mizaaj Main Sanjeedgi and regret he milay gi aksar.. umeed kaheen kaheen hi hoti hai.. 
Re: Poet of The Month.. ADEEM HASHMI..
Kuch Log Jin Ko Fikr-E-Ziyaan De Dia Gaya
Kuch Wo Hain Jin Ko Sara Jahaan De Dia Gaya
Dil Ki Muhabbaton Ka Bahao Hai Jis Tarah
Darya Hai Jis Ko Aab-E-Rawaan De Dia Gaya
Aankhon Ko Saamnay Ke Ilaaqay Deay Gaye
Dil Ko Chhupa Hua Bhi Jahaan De Dia Gaya
Izhaar-E-Ishq Wo Bhi Baru-E-Sitam’garaan
Koh-E-Garaan Ko Sung-E-Garaan De Dia Gaya
Jesay Haray Shajar Ko Laga Di Gai Ho Aag
Kuch Iss Tarah Ka Dil Ko Dhuaan De Dia Gaya
Bichhray Nahi, Wo Baat Bichharnay Ki Yaad Hai
Ghaa’o Nahi Dia Hai Nishaan De Dia Gaya
Rehta Kisay Adeem Baharon Ka Intezaar
Acha Hua Ke Ehd-E-Khizaan De Dia Gaya
Roz-E-Hisaab Khauf-E-Hisaab Uss Ko Hai Adeem
Wo Jis Ko Fikr-E-Sood-O-Ziyaan De Dia Gaya
Re: Poet of The Month.. ADEEM HASHMI..
Karvaan Badlo Zara Mehmil Badal Ker Dekh Lo
Aik Manzil To Nahi Manzil Badal Ker Dekh Lo
Kia Hui Mehfil Tumhain Pal Main Pata Chal Jaye Ga
Aik Lamhay Ke Leay Mehfil Badal Ker Dekh Lo
Ye Muhabbat Ka Shajar Hai Ye Yaheen Lag Jaye Ga
Tum Bajaye Nakhl, Aab-O-Gul Badal Ker Dekh Lo
Kion Dibotay Ja Rahay Ho Kashtion Per Kashtian
Duur Hai Saahil To Phir Saahil Badal Ker Dekh Lo
Kaun Kitna Chahta Hai Sab Pata Chal Jaye Ga
Tum Hamaray Sath Apna Dil Badal Ker Dekh Lo
Sirf Do Nuqto’n Main Hai Dunya Ki Saari Roshni
Warna Jo Aankhon Main Wo Til Badal Ker Dekh Lo
Sung To Jazbaat Ko Mehsus Ker Sakta Nahi
Wo Jo Seenay Main Dhari Hai Sil Badal Ker Dekh Lo
Itna Naazuk Ayena Rakhna Zaruri To Nahi
Toot’ta Rehta Hai Dil To Dil Badal Ker Dekh Lo
Dooriaan, Dushwariaan Sab Samnay Ajayen Gi
Hum Se Ek Pal Ke Leay Manzil Badal Ker Dekh Lo
Saari Dunya Aik Jesi To Nahi Hoti Adeem
Adal Hai Darkaar To Aadil Badal Ker Dekh Lo
Rehem Aata Jaye Ga Uss Ko Sada Tum Per Adeem
Qatl Hona Chahtay Ho Phir Qaatil Badal Ker Dekh Lo
Re: Poet of The Month.. ADEEM HASHMI..
Darya Se Koh’saar Se Pehle Ki Baat Hai
Insaan Her Aitbaar Se Pehle Ki Baat Hai
Nafrat Se Aur Pyar Se Pehle Ki Baat Hai
Ye Tujh Pe Aitbaar Se Pehle Ki Baat Hai
Jumbish Thi Aankh Main Bhi Badan Main Bhi Rooh Thi
Ye Baat Intezaar Se Pehle Ki Baat Hai
Dil Meray Ikhtiaar Main Hota To Tha Magar
Ye Teray Ikhtiaar Se Pehle Ki Baat Hai
Jab Dil Pen Eel Ban Ke Dikhi Theen Na Khuahishain
Ye Tujh Sitam Shuaar Se Pehle Ki Baat Hai
Kuch Saar’baan Thay Aur Jaras Ki Sadaa Bhi Thi
Ye Baad-e-Raigzaar Se Pehle Ki Baat Hai
Ek Kaarwaan Aur Aik Tha Mehmil Bhi Darmiaan
Ye Raah Ke Ghubaar Se Pehle Ki Baat Hai
Wo Aah-E-Dil’shagaaf Adeem Aur Wo Tarap
Ye Dard Ke Khumaar Se Pehle Ki Baat Hai
Ek Dard Tha Kisi Ki Nishani Dia Hua
Lekin Ye Teray Pyaar Se Pehle Ki Baat Hai
Ek Aashiaan Tha Uss Main Parinday Bhi Thay Adeem
Ye Mausam-e-Bahaar Se Pehle Ki Baat Hai
Re: Poet of The Month.. ADEEM HASHMI..
Jab Bayaan Karo Ge Tum Hum Bayaan Main Niklain Ge
Hum He Dastaan Ban Ker Dastaan Main Niklain Ge
Ishq Ho Muhabbat Ho Pyaar Ho Ke Chaahat Ho
Hum To Her Samander Ke Dermiaan Main Niklain Ge
Raat Ka Andhera He Raat Main Nahi Hota
Chaand Aur Sitaaray Bhi Aasmaan Main Niklain Ge
Dekh To Kabhi Shab Ka Kaarwaan Sitaron Ka
Noor Ke Kaee Mehmil Kehkashaan Main Niklain Ge
Boliaan Zamanay Ki Mukhtalif To Hoti Hain
Lafz Pyaar Ke Lekin Her Zubaan Main Niklain Ge
Kaat Ker Badan Saara Qaash Qaash Main Jhaankain
Aap Ke Hew’lay He Qalb-O-Jaan Main Niklain Ge
Khaak Ka Samander Bhi Kia Ajab Samander Hai
Iss Jahaan Main Doobain Ge Uss Jahaan Main Niklain Ge
Qissa-E-Sukhan’goii Jab Adeem Aye Ga
Hum Bhi Waaqia Ban Ker Dastaan Main Niklain Ge
Sirf Sabz Pattay He Pe’rr Per Nahi Hotay
Kuch Na Kuch Parinday Bhi Aashiaan Main Niklain Ge
Re: Poet of The Month.. ADEEM HASHMI..
Nice Sharing Ahmer.. :k:
Re: Poet of The Month.. ADEEM HASHMI..
Gum apni Mohabbat mein donon...
Gum apni Mohabbat mein donon nayab ho tum nayab hain hum
kia hum ko khuli ankhain daikhain ik khvab ho tum ik khvab hain hum
aankhain jo hain apne chehre par ik sawan hai ik bhaadon hai
aey gham ki nadii tu fikrr na kar is waqt barray sairab hain hum
iss waqt talatum khaiz hain hum gardish mein tumhain b le lain ge
iss waqt na tair aey kashti-e-dil is waqt to khud gerdab hain hum
ikk hans puranii yaadon kaa baithaa huva kankarr chuntaa haii
tapti huii hijr ki gharriyon mein sookha huva ik tailab hain hum
aey chashm-e-falak aey chashm-e-zameen hum log to phir ane k nahin
do chaar gharri ka sapna hain do chaar gharri ka khvab hain hum
Re: Poet of The Month.. ADEEM HASHMI..
thnx Shumaisa for adding up a gr8 ghazal 
Re: Poet of The Month.. ADEEM HASHMI..
Tum Bhi Apne Saharay Chalay Jao Ge Hum Bhi Apne Saharay Chalay Jayen Ge
Jo Maza Raasta Mil Ke Chalnay Main Hai Wo Mazay Bhi To Saray Chalay Jayen Ge
Mil Ke Chalnay Se Mazil Na Koi Milay Mil Ke Chalnay Se Rasta To Kat Jaye Ga
Tum Hamaray Saharay Chalay Jao Ge Hum Tumharay Saharay Chalay Jayen Ge
Koi Job Hi Kahay Koi Job Hi Karay Dil Main Toofaan Muhabbat Ke Ruktay Nahi
Tum Bhi Hum Ko Pukaray Chalay Jao Ge Hum Bhi Tum Ko Pukaray Chalay Jayen Ge
Aakay Dekho Muqabil Hamaray Zara Aisay Wesay To Hum Bhi Juaari Nahi
Tum Dil-o-Jaan Jeetay Chalay Jao Ge Hum Dil-o-Jaan Haray Chalay Jayen Ge
Wo Haseen Hai Adeem Uss Ka Mansab Hai Ye, Qatl Kerta Rahay Muskurata Rahay
Tum Bhi Jaan Uss Pe Waray Chalay Jao Ge Hum Bhi Jaan Uss Pe Waray Chalay Jayen Ge
Re: Poet of The Month.. ADEEM HASHMI..
Tum Gaye Saari Mehfil Ujar Jaye Gi Log Saray Ke Saray Chalay Jayen Ge
Hum Muhabbat Ke Maaron Ka Dar Hai Ager Hum Muhabbat Ke Maray Chalay Jayen Ge
Pyaas Dil Ke Naseebon Main Hai To Rahay Pyaas Aur Paani Ka Rishta To Hai
Koi Shikwa Hai Lehron Ko Hum Se Ager Hum Kinaray Kinaray Chalay Jayen Ge
Qarz Tum Chaahat Ka Do Ya Na Do Hum To Apni Muhabbat Ke Maqrooz Hain
Tum Palat Ke Pukaro Na Hum Ko Magar Hum Tumhi Ko Pukaray Chalay Jayen Ge
Kesi Dunya Main Aakay Basera Kia Mil Ke Jis Main Hona Hai Sab Ko Juda
Teray Pyaray Bhi Sary Chalay Jayen Ge Meray Pyaray Bhi Saray Chalay Jayen Ge
Raat Thehro Zara Raat Thehro Abhi Do Ghari Aur Andhera Zara Rok Lo
Dhoondna Hai Muqaddar Ka Taara Humain Din Hua To Sitaaray Chalay Jayen Ge
Tum Na Aao To Kia Bhool Jao To Kia Hum Ko Jitna Bhi Jeena Hai Jeena To Hai
Dosti Jo Nahi Ziondagi He Sahi Zindagi He Guzaray Chalay Jayen Ge
Re: Poet of The Month.. ADEEM HASHMI..
Ker Ke Wafa Palat Ke Wafa Mangnay Laga
Kia Zarf Tha Ghari Main Sila Mangnay Laga
Ye Qeht-E-Husn Tha Ke Nihayat Thi Husn Ki
Her Shakhs Uss Haseen Ka Pata Mangnay Laga
Uss Ki Hathelion Pe Khilay Phool Dekh Ker
Her Meh’jabeen Ka Haath Hina Mangnay Laga
Jab Se Usay Azeez Hui Meri Zindagi
Main Apni Zindagi Ki Duaa Mangnay Laga
Seenay Se Aah Aankh Se Aansu Talab Keay
Gham Ka Shajar Bhi Aab-O-Hawa Mangnay Laga
Hamdardiaan Wo Baad-E-Saza Uss Ne Keen Adeem
Jo Be’khata Tha Wo Bhi Saza Mangnay Laga
Halaat Iss Qadar Thay Diger’goon Zameen Ke
Aaker Zameen Pe Bheek Khuda Mangnay Laga
Re: Poet of The Month.. ADEEM HASHMI..
Isay Paana Tha Uss Ko Khona Tha
Ye Bhi Hona Thaw Wo Bhi Hona Tha
Kitni Dair Aur Uss Ko Rona Tha
Wo Jo Hona Tha, Wo To Hona Tha
Shaayad Iss Waastay Mili Aankhen
Bojh Kuch Aansu’on Ka Dhona Tha
Shab-E-Mehtaab, Aaftaab-E-Shaam
Aik Chandi Thi Aik Sona Tha
Kia Ghazab Ker Lia Hai Aankhon Ne
Mujhe To Tujh Se Chhup Ke Rona Tha
Hum Ne Moti Samajh Leay Thay Adeem
Warna Daaman Kisay Bhigona Tha
Re: Poet of The Month.. ADEEM HASHMI..
Koi Pathar Koi Gohar Kion Hai
Farq Logon Main Iss Qadar Kion Hai
Tuu Mila Hai To Ye Khayaal Aaya
Zindagi Itni Mukhtasar Kion Hai
Jab Tujhe Laut Ker Nahi Aana
Muntzair Meri Chashm-E-Terr Kion Hai
Uss Ki Aankhain Kaheen Sadaf To Nahi
Uss Ka Her Ashk He Gohar Kion Hai
Raat Pehle He Kion Nahi Dhalti
Teergi Shab Ki Ta’sahar Kion Hai
Ye Bhi Kesa Azaab De Daala
Hai Muhabbat To Is Qadar Kion Hai
Tuu Nahi Hai Roz-O-Shab Kese
Shaam Kion Agai Sahar Kion Hai
Kion Rawana Hai Her Ghari Dunya
Zindagi Mustaqil Safar Kion Hai
Main To Ek Mustaqil Musafir Hoon
Tuu Bhala Mera Hamsafar Kion Hai
Tujhe Milna Nahi Kisi Se Adeem
Phir Bichhernay Ka Tujh Ko Darr Kion Hai
Re: Poet of The Month.. ADEEM HASHMI..
Barish Hai Aansu’on Ki Zameen Per Jhari Hui
Phir Bhi Hai Dil Main Dard Ki Naddi Charhi Hui
Baaqi Tamaam Umrr Bichhernay Ki Baat Thi
Milnay Ki Guftugu To Ghari Do Ghari Hui
Ye Raah To Chuni Thi Judai Ke Waastay
Ye Aarzu-e-Wasl Kahan Aa Khari Hui
Ye Raah Ki Nahi Ye Muqaddar Ki Baat Hai
Manzil Chuni Hai Jo Wohi Manzil Kari Hui
Sun To Sahi Hawa-e-Khizaan, Dekh To Sahi
Kia Keh Rahi Hai Phool Ki Patti Jhari Hui
Saw Saal Bhi To Lamha’ba’lamha Baray Huay
Ye Umrr Iss Tarah Bhi Ghari Ki Ghari Hui
Ek Pal Main Jo Hai Doosray Pal Main Nahi Hai Wo
Her Ek Ghari Main Umrr Zara Si Bari Hui
Pehlay He Keh’nagi Ko Chhupana Muhaal Tha
Ek Saal Aur Umrr Hamari Bari Hui
Taray Falak Pe Aankh Main Aansu Wisaal Ke
Ye Raat Motion Se Hai Saari Jari Hui
Iss Ke Leay To Raah-e-Wafa Chaheay Adeem
Her Raah Main Nahi Hai Muhabbat Pari Hui
Kis Ki Majaal Arz-o-Samaan Ko Hila Sakay
Jo Cheez Jis Jaga Thi Waheen Hai Pari Hui
Zoq-e-Sukhan Ye Naaz Yunhi To Nahi Adeem
Hum Bhi Bhi Meerza Ki Ghazal Hai Pari Hui
Nazrain Pari Zara Si Teri Kainaat Per
Dekhi, Bina Bagher Imaarat Khari Hui
Aadam Hai Aik Nau-e-Bashar Mukhtalif Adeem
Sachi Hai Baat Phir Bhi Lagi Hai Ghari Hui