Re: Poet of Month " Nasir Kazmi "
dil mein ik lahar sii utthi hai abhii
dil mein ik lahar sii uThii hai abhii
koii taazaa havaa chalii hai abhii
shor barpaa hai Khaanaa-e-dil mein
koii diivaar sii girii hai abhii
kuchh to naazuk mizaaj hain ham bhii
aur ye choT bhii naii hai abhii
bharii duniyaa mein jii nahiin lagataa
jaane kis chiiz kii kamii hai abhii
tuu shariik-e-suKhan nahiin hai to kyaa
ham-suKhan terii Khaamoshii hai abhii
yaad ke be-nishaaN jaziiron se
terii aavaaz aa rahii hai abhii
shahar ke becharaaG galiyon mein
zindagii tujh ko DhuuNDhatii hai abhii
so gaye log us havelii ke
ek khiDakii magar khulii hai abhii
tum to yaaro abhii se uTh baiThe
shahar mein raat jaagatii hai abhii
vaqt achchhaa bhii aayegaa 'Nasir'
Gam na kar zindagii paDii hai abhii