wohi guliyaan wohi koochay wohi serdi ka mosam hai
usi andaaz se apna nizam-e-zeist berham hai
ye husn-e-ittifak aisa keh nikhri chandni bhi hai
wohi her sumt verani udasi tashnagi si hai
wohi hai bhir soochon ki wohi tanhaiyan phir se
musafir,ajnabi aur dasht ki punhaiyan phir se
mujhe sab yaad hai kuch saal pahlay ka ye qissa hai
wohi lamha tow weranay ka aik aabad hissa hai
meri aankhon mey wo aik lamha mojood ab bhi hai
wo zinda raat mere saath laakhon baar jagi hai
kisi ne raat ki tanhayi mey sergoshiyan ki thein
kisi ki nerm guftari ne dil ko loriyaan di thein
kisi ne meri tanhayi ka sara kurb banta tha
kisi ne raat ki chunri mey roshan chand tanka tha
chamaktay jugnuon ka sail aik bakhsha tha ratoon ko
dharakta sa naya unwaan dya tha mere khabon ko
mere sheron mey wo ilhaam ki sorat mey utra tha
ma’aani bun ke jo lufzon mey pahli baar dharka tha
wo jis ke honay se zindagi naghma sirayi hai
usay kehna keh bheegi january phir lout aayi hai….