**ahliyaan-e-maHfil kii Khidmat meN meraa salaam pahoNche,
ummeed hai k aap sab ke mizaaj-e-giraamii ba-Khair hoNge. is bazm meN maiN aaj apnii pahli Ghazal pesh kar rahaa huuN is ummeed e qawii ek saath k aapkii taba’-e-naazuk par baar-e-giraaN na guzregii. aapkii aaraa o tanqeed o tanqees kaa shiddat se intizaar rahegaa. shukria.
faqat Khaak_nashiiN,
_______KKF
**
**1.
'ishq kii aah o zaariyaaN na gaiiN
Husn kii dil_farebiyaan na gaiiN
aaii peerii, gaye shabaab ke din
phir bhii ulfat_sho’aariyaan na gaiiN
aaNkhoN aaNkhoN meN kah diyaa sab kuchh
'ishq kii be_zabaaniyaaN na gaiiN
din to juuN tuuN guzar gayaa, lekin
raat kii be_qaraariyaaN na gaiiN
zabt kis tarHa ho sake, jab k
dil kii be_iKhtiyaariyaaN na gaiiN
huuN guneh_gaar phir bhii baKhshish kii
dil se ummeed_vaariyaaN na gaiiN
bandagii ko bhulaa diyaa maiN ne
unkii banda_navaaziyaaN na gaiiN
Shai’Kh_Ji tum se sab gayaa, lekin
jhooTii parhez_gaariyaaN na gaiiN
maut sar par khaRii hai, “Sai’hbaa-Ji!”
phir bhii rangiiN_bayaaniyaaN na gaiiN**
Re: phir bhii rangiiN_bayaaniyaaN na gaiiN…merii ek Ghazal
thank you bhai ji.
aapkii pasand aur Hausalah afzaaii ke liye maiN mamnoon aur mutashahhir huN aaapkaa
**
aapkaa beHad shukria. numbering is liye k taa k jawaab dene waaloN ko aasaanii ho aur unheN agar koi she’r pasand aa jaaye to use poora she’r na likhnaa paRe sirf number de kar Hawaala de deN…just for the sake of convenience of thew readers if they wished to refer to any she’r. :)**
k: … thanx for sharing it with us
