manzaron saraabon ki
shiddatton se ghabra ker
raah toa badal li hai
per ye dil ye sodai
rok rok laita hai
doob doob jata hai!
" tumhein kisnay kaha thaa "
tumhein kisnay kaha thaa
dopehar ke garm sooraj ki taraf deikho
aur itni dair tak daikho
ke beenai pighal jae!
tumhein kisnay kaha thaa
asman se toot-ti andhi bijlion se dosti kerlo
aur itni dosti ker lo
ke ghar ka ghar hi jal jae!
tumhein kisnay kaha thaa
ik anjanay safar mein
ajnabi rah-roh ke humrah door tak jao
aur itni door tak jao
ke woh rasta badal jae!
by: Farhat Abbas Shah
