Ger mujhay is ka yaqeeen ho mery humdum mery dost
Ger mujhay is ka yaqeen ho key tery dil ki thakan
teri aankhoon ki udaasi tery seeney ki jalan
meri diljoi mery pyar sey mit jaye gi
Ger mera harf-i-tasali woh dawa ho jis sey
jee uthey phir tera ujra howa bee-noor damagh
teri peeshani sey dul jayeen yeh tazleel key daagh
teri beemar jawani ko shifa ho jaye
Ger mujhay is ka yaqeen ho mery hamdam mery doost
roz-o-shab , sham-o-seher mein tujhay behlata rahoon
mein tujhay geet sunata rahoon halkay sheereein
aabsharoon key baharoon key chaman zaroon key geet
aamid-i-subah key mehtab key siyaroon key geet
tujh sey mein husn-o-muhabbat ki hikayaat kahoon
kaisey maghroor hasenaoon key barfab sey jism
garm hathoon ki hararat mein pighal jatey hain
kaisay ek chehray kay thehray howey manoos naqoosh
dekhtay dekhtay yaqlakht badal jatay hain
kis tarah aariz-i-mehboob ka shifaaf balor
yaq ba yaq baada-i-ahmer sey dahak jata ha
kaisay gulcheein kay liye jhukti ha khud shaagh-i-gulaab
kis tarah raat ka aeevan mehak jata ha
yoon hi betha rahoon betha rahoon teri khatir
geet bunta rahoon gata rahoon teri khatir
per mery geet tery dukh ka mudawa hi naheen
naghma jarah naheen , moonis-o-ghamkhaar sahi
geet nashter to naheen , merham-i-aazar sahi
tery aazaar ka chara nahee nashtar kay siwa
aur yeh sifaq maseeha mery qabzay mein naheen
is jahan kay kisi zi-roh kay kabzay mein naheen
haan mager tery siwa .. tery siwaa .. tery siwaa
(Faiz)
