*Panchhi teri yaado’n ke jab dil mein chahaktay hai’n |
Tanhaai ke kaandhe par sar rakh ke sisaktay hai’n ||
Chaandi ke KHUDA walo aaho’n se daro unki |
Footpath ke seenay se lag ke jo bilaktay hai’n ||
Tadbeer ki koshish ki mehnat ki zaroorat hai |
Qismat ke gohar aisay thoRay hi chamaktay hai’n ||
khiRki se siyasat ki jab jhaa’nka to ye jaana |
kyo’n bastiya’n jalti hai’n kyo’n dangay bhaRaktay hai’n ||
Jalte hai’n hamaare ghar kat’te hai’n hamaare sar |
Ilzaam ke khanjar bhi hum hi pe lapaktay hai’n ||
Ummeed ki chhat koi JAWED nahi sar pe |
Oopar se museebat ke patthar bhi tapaktay hai’n ||*
