Nabi na they magar insaan pay jaan chirhaktay they
Suna hai aglay zamaanay kay log achay they
Wo bastiyan bhi ajab thin wo hastiyan bhi ajab!!–
Keh aandhiyon mai bhi jin kay chiraagh jaltay they
Unhon nay mujh say kaha tha kisi say lau na laga
Ujarh kay soch raha hun wo log sachay they
Khud apni zaat ka gham bhi shareek-e-haal raha
Wa,garna hum teray gham say kahan beheltay they!!–
Wo sheher kia huay jinkay berehna tab baasi
Ridaa-e-barg ko malboos-e-jaan samajhtey they
Wo daur beet gaya jab teray baghair humein
Tamaam sheher kay rastay udaas lagtay they!!–
Wo lafz bhool gaye jin kay aainon mai kabhi
Teray badan kay khad-o-khaal tak utartay they
Wo aankh bujh gai jiss ki kiran kiran kay liyee
Kabhi kabhi toh teray hont bhi tarastay they!!–
Wo seher toot gaya jiss kay aasray pay kabhi!!–
Hun asmaan ko bhi teri galli samajhtay they
Wo rang rooth gaye jo hawa-e-shaam kay saath
Teray khunk lab-o-rukhsaar par bikhartay they
Tu kal idhar say jo guzra toh ehl-e-sheher kay saath
Bura na maan keh hum khud bhi tujh pay hanstay they
Mohsin Naqvi****
