Kamal-e-zabt ko khud bhi to azamaun gi
Main apane hath se us ki dulhan sajaun gi
Supurd kar ke use chandani ke hathon
Main apane ghar ke andheron ko laut aun gi
Badan ke karb ko wo bhi samajh na paye ga
Main dil may roun gi ankhon may muskuraun gi
Wo kya geya ke rafaqat ke sare lutf gaye
Main kis se ruth sakun gi kise manaun gi
Wo ik rishta-e-benam bhi nahin lekin
Main ab bhi us ke isharon pe sar jhukaun gi
Bicha diya tha gulabon ke sath apna wajood
Woh so ke uthe to khwabon ki raakh uthaun gi
Ab us ka fann to kisi aur se mansoob hua
Main kis ki nazm akele may gungunaun gi
Jawaz dhoondh raha tha nai muhabbat ka
Wo kah raha tha ke main us ko bhool jaun gi
Sama`aton may ghane jangalon ki sansen hain
Main ab kabhi teri awaz sun na paun gi
