Lahu Ka Safar
**(A Novel Written By “Tariq Ismail Sagar”)**
**(A True Story of a Pakistani Commando-Aap Beeti)**
(Part 1)
**Harf-e-Awwal**
Meray kamray mein wo daakhil huay to bayhad khush thay--------
Paas aa ker baith gaey aur aik lifafa meri tarf bardhatey hue muskuranay lagay:
“Bhai Jaan! Ye mera naya musawida hai, aap is per deebacha likhen gay.”
“kia unwan hai kitab ka?”
“Lahu Ka Safar!”
“Aur Mauzoo kia hai?”
“Mashraqi Pakistan!”
“Mashraqi Pakistan?” mein haeraan ho kar unki taraf dekhney laga!
“wohi Mashraqi Pakistan jisay hamara katta hua baazu kehtay hen?”
Aur is se qabal keh wo apney lub kholtay, mein ne unki ankhon mein jhaanka:
-------jis ke chehray pe mein muskurahat dekh raha tha, unki ankhon mein ghum, ghussay aur andeshon key taareek saey lehra rahey thay.
Mein ziada dair unki ankhon mein na doob saka------
Dusray hi lamhay meri nazren un kutti hui baanhon aur nidhaal jisamon per aa ker ruk gai theen jinhen hum1947 mein aik qaaflay ki surat mein apne gharron ke samnay se guzarta dekh rahey thay
Ajeeb bhayanak si aik subah thi wo, jub mohallay me shor much gaya:
“qaaflay aa gaey! qaaflay aa gaey!!”
Bhaagam bhaag hum gharon se nikal ker sarak per aa ker kharday ho gaey------
Affo Allah! Wahan aik do nahen, na 100,200 afraad thay, hud-e-nigah tak phailay hue logon ka azeem qaafla humaray saamnay ahista ahista reeng raha tha.
Wo guzar rahey thay aur----mein dekh raha tha:
Un mein aurtein bhi hen, bachay bhi, jawan bhi hen aur burdhay bhi! Kisi ke bazu katey hen to kisi ki tangein tooti hui hen-----aur kitnon ke zakhmon se khoon ras ras ker zameen per apne naqsh sabat karta chala jar aha tha.
Kuch log apne sathi peechay dafan ker aye thay aur kai janazay waheen zameen per bay-gor-o-kafan parday un janay waalon ko alwida keh rahey thay.
Mein sochne laga:
Na janay ye log un anjaani manzilon ki taraf kahan se aa rahey hen aur kb unhon ne apna ye pur malaal safar shuroo kia.
Lekin--------
Sheher waalon ne unhen dekhtay hi apne bazu phelaa diye-------logon ne apne seenay khol diye.
Aur ye qaflay yaheen jazb ho gaey.
--------------usi dharti mein simat gaey jissay Pakistan kehtay hen.
Jub ye qaaflay apni jaga simat simtaa gaey to izhaar-e-tashakkur ke liye mein bhi sar-basajood ho gaya.
Lekin ye dekh ker meri hairat ki inteha na rahi keh meray jhukney se pehlay hi meray ansu bhi sajda raiz ho chukay thay.
----------wo is arz-e-muqaddas ko salam-e-aqeedat pesh kernay ke liay zameen per utar aye thay jiski ghaneri chaon me musalmanon ke ye luttay pittay qaaflay aa aa ker panaah letay aur phir yaheen-------isi khaak mein hamesha ke liay ruch bus jatey.
Magar--------
Meray honton per abhi Kalma-e-Shukar jaari tha keh aik shor sun ker meray kaan kharday ho gaey-----------mein us taraf lapka:
Aah! Meri ankhon ke saamnay aaj mera dusra baazu bhi jal raha tha:
-----------Sindh aag ki lapait mein aa giya tha!
Nafrat ki jo bhattiyan kal tak logon ke seenon me sulag rahi theen, wo ab shoalon mein tabdeel ho ker aasmaan se baatein kernay lagi theen.
Mein ne fauri taur per mashraqi Pakistan ka naqsha apni ankhon ke samnay khola:
Kai pur israar haath isi tarah humaray is bazu ko bhi hum se alag kernay ki fikar ker rahay thay.
Bilkul wohi naaray goonj rahay thay-------har taraf usi tarah ajnabiyyat ka izhaar kia jaa raha tha aur aag ka ye alao tez se tez tar ho raha tha.
Mein darney laga:
“Ya Allah! Jis ghaneri chaon ke daamin mein aa ker wo qaaflay panaah liya kertay thay, kia---------ye shoalay usi aashiyanay ko jalanay ki aarzoo to naheen ker rahay?”
“Al-amaan, Al-hafeez!! Meray hont tarapnay lagay:
“Kia----------ab phir lahu ka safar shuru honay wala hai?” mein apne aap se baatein kernay laga:
“Khudaya! Ab humaari manzil kiya ho gi---------?”
“Aur--------ab wo qaaflay kidhar jaen gay?”
Mein apne khayalon me gum tha aur Tariq bhai barday inhamaak se meray maathay per banti, bigarti lakeerein dekh dekh ker ye suraagh laganay ki koshish ker rahaey thay:
“Akhir meri manzil kia hai?”
Aur jub wo kuch na paa sakay to bolay: “Bhai jaan! Bhai jaan!! Mera deebacha kon likhay ga?”
“mein to nahen likhun ga!”
“to phir-----------isay kon likhay ga?”
“wohi log---------------jo kal khoon kay darya tair ker aye thay!”
“Aur agar wo Allah ko pyaray ho gaey to?”
“to phir-----------ye farz wo log ada karein gay jo aaj is zameen ke asal waaris hen!”
“Yani----------?”
“meri muraad---------is jawan nasal se hai jis ke seenon me un ke aaba-o-ajdaad ka khoon mojzan hai!”
------------jo taareekh ke dhaaron se azadi ka mafhoom noch ker yahan pohonchay hen.
------------jo zinda rehnay ke liay paida hotay hen wo apne baal-o-par per bharosa ker saktay hen.
-----------jo shama-e-azadi ko apne khoon se roshan kartey hen aur jab maadr-e-watan awaz day to jaanon ka nazrana pesh ker detay hen!!
Baatein kertay kertay thordi dair ke liay mein ruka to wo kharday ho gaey, janay ki ijazat chahi to mein ne jhanka:
Jin ankhon mein ghum, ghussay aur andeshon ke taareek saey lehra rahey thay.
--------ab wahan aik azm jhalak raha tha.
--------aik sipaahee ka azm.
Aur yahi mera maqsad tha!
Sheikh Muhammad Ahsan
(To Be Continued………….)
