** Khudkushi se pehle**
uff ye be-dard siyahi ye hawa ke nauhe
kis ko maloom hai iss shab ki sahar ho ke na ho
ek nazar tere dareeche ki tarf dekh tu luun
duubti aankhon mein phir taab-e-nazar ho ke na ho
sard hoti huee batti ke dhuwein ke hamraah
haath phaelaye barhe aate hain bojhal saye
kon pochay meri aankhon ke sulagte aansoo
kon uljhe huay balon ki girah suljhaaye
Aah ye ghaar-e-halakat ye diye ka mohabbas
umr apni inn he tareek makaanon mein kati
zindagi fitrat-e-behis ke paraee taqseer
ek haqeeqat thi magar chund afsanon mein kati
kitni aasaaish-e-hasti rahi aiwaan mein
kitne dar meri jawani pe sada bund rahe
kitne hathon ne buna atlas-o-kamkhaab magar
mere malboos ki taqdeer mein paewand rahe
zulm sehte huay insaanon ke iss maqtal mein
koee farda ke tasawwur se kahan tak behle
umr bhar reingte rehne ki saza hai jeena
aik do din ki azziyat ho tu koee seh le
wahi zulm hai fazaon pa abhi tak taari
jaane kab khatm ho insaan ke lahoo ki taqseer
jaane kab nikhre siya posh qaza ka joban
jane kab jaage sitam-khurda bashar ki taqdeer
abhi roshan hain tere garm shabistan ke liye
aaj mein maut ke ghaaron mein utar jaoonga
aur dum thorhti batti ke dhuwein ke hamraah
serhad-e-marg-e-musalsal se guzar jaoonga
By: Sahir ludhianvi