YooN to main dunia ki zyada parwa nahi karta lekin jaane kis mood ki likhi hui ye nazm parsoN nazar se guzri to socha share karooN…here it is…
[INDENT][INDENT]**Aakhir-Kaar
**
[/INDENT][/INDENT]Wafaa o ishq par ham shaairy mein kis qadar likhein !
KahaaN tak hijr likhein, kab talak ranj-e-jigar likhein !
Kabhi to khud-ba-khud ham par udaasi ki inaayat ho
Kabhi dil ko udaasi k na hone ki shikaayat ho
Kabhi tanhaai ki chaahat, kabhi logoN se be-zaari
Kabhi mehfil se ho nafrat, kabhi mehfil lage pyaari
Kabhi ham bolne par aayeN to bole chale jaayeN
Kitaab-e-zaat ko har shakhs pe khole chale jaayeN
Kabhi chup hoN to pathar k kisi but ka gumaaN guzre
Khamoshi dil lubhaati ho, sadaa hamko garaaN guzre
KahaaN tak yaad-e-maazi saath le kar ham jiye jaayeN
Hamesha kis tarha she’roN ko ik hi rukh diye jaayeN
KahaaN tak apne daaman ko lahu se tar-ba-tar likhein
KahaaN tak zindagaani ko andheroN ka bhaNvar likhein
Kabhi ujRi hui haalat banaaye shehr mein niklein
Mohabbat k bharam ko ham bhulaaye shehr mein niklein
Kabhi ham dostoN se zindagi ka gham cHupaate hoN
Kabhi ghairoN ko dil ki daastaanein sab sunaate hoN
Kabhi ham raunaqein chaahein, kabhi viraaniyaaN chaahein
Ajab c baat hai, khush hoN to gham-samaaniyaaN chaahein
Hua tha ishq ham ko, phir gham-e-hijraaN mila ham ko
Naya kya tha bhala is mein k jo batlaayeN aalam ko !
YuNhi itne baras ik dillagi k naam kar Daale
YuNhi she’roN mein qisse aashiqi k aam kar Daale
YuNhi chanchal sheher ko ham udaasi ka nagar likhein !
YuNhi aabaad ghar ko kab talak veeraan ghar likhein !
Zara ab waqt ko marham lagaane ki ijaazat dein
Jigar k zakhm ko ab bhar hi jaane ki ijaazat dein
Kabhi khud par udaasi koi bhi taari na hone dein
Kisi gham se ab is dil ki kabhi yaari na hone dein
Sheher mein, sheher waaloN ko kabhi ungli uThaane ka
Koi mauqa hi na dein ham unhein baatein banaane ka
Chalo yaksaaniyat ko shaairy se khatm kar Daalein
Chalo dunia pe pehle se zara haT kar nazar Daalein
Chalo ham zindagi se hijr ka mausam badal Daalein
Sukhan ki us puraani c ravish ko ham badal Daalein
Chalo ham zindagaani ko umeedoN ka shajar likhein !
ShaboN ko dar-ba-dar likhein ! chalo koi sahar likhein !
[INDENT]*** * * * * * * * * * * * ***
[/INDENT]Feb’ 2001
