Nazm: “bachpan”

Arts & Culture Poetry ( Intikhaab & Sho'ra-e-Gupshup)
1

aadaab dosto!

ummiid hai aap sab Khairiyat se hoNge!

sochaa to ye thaa ki is martabaa aap kii Khidmat meN ek Ghazal pesh karuuNgaa. lekin filhaal ye nazm mulaahizah farmaaiye, jo pichhle hafte hii huii hai (fresh from the kitchen!). ummiid hai aap pasand farmaayeNge. apnii qiimatii aaraa kaa izhaar zaruur kiijiyegaa. intizaar rahegaa.

**nazm: “bachpan”

vo din khelne ke, kahaanii kii raateN
vo ik vaqt-e-fursat, sukuuN kaa zamaanaa
bahut yaad aatii haiN bachpan kii baateN
zamaanaa thaa vo, haai, kitnaa suhaanaa!

na khaane kii fikreN, na kapRoN kii parvaa
na aaTe kaa ronaa, na lakRii kii diqqat
na bangle kaa laalach, na Gham gaaRiyoN kaa
na zevar kii Khvaahish, na dhan kii zaruurat

na majruuh seenaa, na chaak-e-girebaaN
na gaaloN ke gaDDhe, na aaNkhoN ke haale
na raatoN ka jagnaa, na zulf-e-pareeshaaN
na raahoN ke kaaNTe, na pairoN ke chhaale

na mulkoN kii jangeN, na qaumoN kii nafrat
na mazhab kaa jhagRaa, na zaatoN kaa chakkar
na vaadoN ke dhoke, na gandii siyaasat
na tafreeq-e-darjaa, na ohdoN kii Takkar

abhii tak haiN mehmaan yaadoN ke ghar ke
vo din, saath tere jo ham ne guzaare
kahaaN kho gayaa tuu hameN chhoR kar ke
dobaaraa chalaa aa, ai bachpan hamaare!!!

Waseem Ahmed**

2

Waseem sahab, bahot khub. bahot achhi nazm hai. dheroN daad kubul kareiN.
"kahaanii kii raateN ",
mujhe aisa lag raha hai ke kyonkii "raateN" plural hai, it should be "kahaanioN kii raateiN"
and similary I am little uncomfortable while reading
"bachpan hamaare".

I just told as my knowledge of Hindi, Unfortunatelly, I don't know Urdu so cannot tell with confidence that I am right on above lines. Just have a look.
Please don't take in otherwise while reading these beautiful nazm I was little in discomfort at these points and so wanted to tell you.

3

dobaaraa chalaa aa, ai bachpan hamaare!!! :teary1:

Beautiful poem, dost jee. :flower1:

thx for sharin’ :~)

4

nice :) thnx for sharing!

5

na mulkoN kii jangeN, na qaumoN kii nafrat
na mazhab kaa jhagRaa, na zaatoN kaa chakkar
na vaadoN ke dhoke, na gandii siyaasat
na tafreeq-e-darjaa, na ohdoN kii Takkar

beautifully written Koi Dost. :flower1:

6

Pramod Bhai ,HH Jee,show_sha and Minerva Nazm pasand farmaane kaa bahut bahut shukriya ! :flower1:

7

Beautiful and keep writing:flower1:

8

Thanx janab :flower1: