**nasiim-e-subah gulashan main guloon se khaeltii hogii
kisii kii aaKhirii hichakii kisii kii dillagii hogii
tumhain daanistaa mahafil main jo dekhaa ho to mujarim hooN
nazar aaKhir nazar hai be-iraadaa uTh gaii hogii
mazaa aa jaayegaa mahashar main kuch sunane sunaane kaa
zubaaN hogii hamaarii aur kahaanii aap kii hogii
sar-e-mahafil bataa dooNgaa sar-e-mahashar dikha dooNgaa
hamaare saath tum hoge ye duniyaa dekhatii hogii
yahii aalam rahaa pardaanashiinon kaa to zaahir hai
Khudaaii aap se hogii na ham se bandagii hogii
ta’ajjub kyaa lagii jo aag ai ‘Seemab’ senay main
hazaaron dil main aNgaaray bhare the lag gai hogii
Seemab Akberabadi
1880 - 1951
**