**
نیا اک رشتہ پیدا کیوں کریں ھم
بچھڑنا ھے تو جھگڑا کیوں کریں ھم
خموشی سے ادا ھو رسم دوری
کوئی ہنگامہ برپا کیوں کریں ھم
یہ کافی ھے کہ ھم دشمن نہیں ہیں
وفاداری کا دعوا کیوں کریں ھم
وفا اخلاص قربانی محبت
اب ان لفظوں کا پیچھا کیوں کریں ھم
ہماری ہی تمنا کیوں کرو تم
تمہاری ہی تمنا کیوں کریں ھم
کیا تھا عہد جو لمحوں میں ہم نے
تو ساری عمر ایفا کیوں کریں ھم
اٹھا کے کیوں نہ پھینکیں ساری چیزیں
فقط کمروں میں ٹہلا کیوں کریں ھم
نہیں دنیا کو جب پروا ہماری
تو پھر دنیا کی پروا کیوں کریں ھم
برھنہ ہیں سر بازار تو کیا
بھلا اندھوں سے پردہ کیوں کریں ھم
ہیں باشندے اسی دنیا کے ہم بھی
سو خود پہ بھی بھروسہ کیوں کریں ھم
چبا لیں کیوں نہ خود ہی اپنا ڈھانچہ
تمہیں راتب مہیا کیوں کریں ہم
پڑی رہنے دو انسانوں کی لاشیں
زمیں کا بوجھ ہلکا کیوں کریں ہم
یہ بستی ھے مسلمانوں کی بستی
یہاں کار مسیحا کیوں کریں ھم
**
