na jaanaa aaj tak kyaa shai Khushii hai
hamaarii zindagii bhii zindagii hai
tere Gam se shikaayat sii rahii hai
mujhe sach-much barii sharmindagii hai
mohabbat mein kabhii sochaa hai yuN bhii
ki tujh se dostii yaa dushamanii hai
koii dam kaa huN mehamaaN muuNh na phero
abhii aaNkhon mein kuchh kuchh roshanii hai
zamaanaa zulm mujh par kar rahaa hai
tum aisaa kar sako to baat bhii hai
jhalak maasuumiyon mein shoKhiyon kii
bahut rangiin terii saadagii hai
ise sun lo sabab is kaa na puuchho
mujhe tum se mohabbat ho gaii hai
sunaa hai ik nagar hai aaNsuon kaa
usii kaa dusaraa naam aaNkh bhii hai
vahii terii mohabbat kii kahaanii
jo kuchh bhuulii huii kuchh yaad bhii hai
tumhaaraa zikr aayaa ittefaaqan
na bigaro baat par baat aa gaii hai