roya hon teri yaad mein din raat musalsal
aesay kabhi hoti nahi barsaat musalsal
kaantay ki tarha hoon mein raqeebon ki nazar mein
rehtay hein meri ghaat mein chhay saat musalsal
chehray ko naey dhab se sajaatay hein wo har roz
bantay hein meri moat k aalaat musalsal
har roz kisi shehr mein hotay hein dhamaakay
rehti hai mere des mein shab-raat musalsal
har roz wo miltay hein naey roop mein mujhko
partay hein meri sehat pe asraat musalsal