Gum sum huwa awaaz ka dariya thaa jo aik shaks
Pathar bhi nahee ab woh sitaara thaa jo aik shaks
Shayad woh koi harf-e-wafa dhoond raha thaa
Chehroon ko baray ghaur se parhta thaa jo aik shaks
Sehra ki tarah jo dair se pyasa thaa woh shaayad
Baadal ki tarah toot ke jo barsa thaa jo aik shaks
Ay taiz hawaa laa koi khabar us ke junoon ki
Tanha safar-e-shauk pe nikla thaa jo aik shaks
Ab aakhri sitaroon mein kaheen naam hai us ka
Ehbaab ki fehrist mein jo pehla thaa aik shaks
Haathon mein chupaaye huwe phirta hay kaheen zakham
Sheeshay ke khiloon se behalta thaa jo aik shaks
Murr murr ke ussay dekhna chahain meri aankhain
Kuch door mujhe chorne jo aaya thaa aik shaks
Ab us ne bhi apnaa leye duniya ke kareenay
Saaye ki rafaaqat se bhi darta thaa jo aik shaks
Har zehan mein kuch naqsha-e-wafa chor gaya hai
Kehnay ko bharay shehar mein tanha thaa jo aik shaks
Munkar hai wohi ab meri pehchaan ka ‘Mohsin’
Aksar mujhe khat khoon se likhta thaa jo aik shaks …
