mire masroof saathi, tum se bus itni guzaarish hai
bahut zyaada nahin kehna, miree itni si khwahish hai
mujhe maloom hai majboor ho haalaat ke haathon
mujhe samjho bahut majboor huun jazbaat ke haathon
ruten ati hain jati hain, magar hamdam nahin aate
agar ik baar rooThen, laut ke mausam nahin aate
miree chaahat ka, ulfat ka tumhen ehsaas hi kab hai
mujhe dene ko ik pal bhi tumhaare paas hi kab hai
tumhen maloom hai jeevan bhala kaise bitaati huun
tumhen jab yaad karti huun, main sab ko bhool jati huun
agar masroof ho jayen to kya sab bhool jate hain
muhabbat ki haseen yaaden kyooN yaaRab bhool jaate haiN
mirey ansoo bahut pyaare hain, mirey sath rehte hain
inhen mujh se muhabbat hai, mira gham ye bhi sehte hain
agar ye intizaar-o-bebasi-o-dard mere hain
to kya samjhoon mirey hamdam, yehi hamdard mere hain?
khilaaya ho Khuda ne kya kabhi sehra mein gul dekha
agar in mein tiree chaahat nahin, mit jaaye har rekha
kabhi dekha, chamakna chaand bhooola ho kisi shab bhi
agar baadal ne ghera ho, jhalak dikhlaata hai tab bhi
agar sooraj nahin chamke to har jaanib andhera ho
to phir socho tumhare bin yahaan kaise sawera ho?
agar fursat mile hamdam to is per sochna laazim
magar tum beqadar, sangdil, sitamgar, behis-o-zalim
tumhen ishq-o-wafa, chaahat, muhabbat ka pata kya hai?
haseen jazbaat hain, in se tumhara waasta kya hai?
Khudavand jor ke dil kis liye yoon tor deta hai
to phir kis ke sahaare jag mein tanha chor deta hai
ata karne ko ik pal ki agar fursat nahin tum ko
to phir is ka to matlab hai, koi chaahat nahin tum ko
bahut chote se jeevan mein bahut choti si hasrat hai
mujhe tum yaad kar lena agar mujh se muhabbat hai!
