Bohat ghambiir rasta hai
kisi anjaan waadi kii
kisi be-naam kuTiya maiN
meri pehchaan rakhi hai
mujhe uss tak pohanchna hai
maGar hadd-e-nazar tak hijr ki daldal bichhi hai
qadam andar qadam sadiyaN gundhi haiN
bohat taariik janGal rah maiN hai
magar zaad-e-safar maiN
silsila dar silsila ohaam milte haiN
na koi chaand wa’day ka
na koi reshami rasta
tammanna ke nasheboN maiN adhuure phuul khilte haiN
jo bazaaroN main bikte haiN na duldaanoN maiN sajte haiN
ye harf-e-muazarat choRo
mujhe ma’luum hai janGal ke din bhee raat jese haiN
azal se ta abd pheli amaavas rooh tak ko dhaNp deti hai
phisalte paa’oN qarnoN tak chaleN tou bas zara se rah kaT’ti hai
ye harf-e-muazarat choRo
ke tum meri bohat lambi musafat ka paRa’o they
mujhe aaGey nikalna hai
kisi anjaan waadii ki
kisi be-naam kuTiya maiN mujhe manzal bulatii hai
mujhe rukhsat karo
meri pehchaan ke ghambiir raston ki musafat par
mujh rukhsat karo!