***Bina jurm-o-khata, khud ko koi aisi saza dena
Bahut mushkil hai meri janaan, tumhein bilkul bhula dena
Mere maula, agar tu ne dobaara zindagi bakshi
Tau bas itni guzarish hai, mujhe patthar bana dena
Mein zehni taur per khud ko zara tayyar kar lunga
Bichar jaane se kuch pehle mere hamdam bata dena
Meri yeh shararat aaj tak naqsh hogi dharkan per
Dabe paun chale aana, tera jhumka hila dena
Faqat itna kaha thaa na, mujhe kuch roshni de do
Tumhein kis ne yeh bola thaa, meri basti jala dena
Jissay barish ke paani mein baha kar muskuratay thay
Mujhe kagaz ki woh kashti zara phir se bana dena
Umer bhar phir tumhara raasta taknay se acha hai
Ke tum jaane se kuch pehle meri aankhain bhuja dena …***
