ruuh bechain hai ik dil kii aziiyat kyaa hai
dil hii sholaa hai to ye soz-e-mohabbat kya hai
vo mujhe bhuul gaye iskii shikaayat kyaa hai
ranj to ye hai ke ro ro kay bhulaayaa hogaa
jhuk gai hogii javaan saal umangon kii jabin
mit gai hogii lalak duub gayaa hogaa yaqin
chhaa gayaa hogaa dhuaan ghuum gai hogii zamin
apane pahale hii gharonde ko jo Dhaayaa hogaa
dil ne aise bhii kuchh afsaane sunaaye honge
ashk aankhon ne piye aur na bahaaye honge
band kamare men jo Khat mere jalaaye honge
ek ek harf jabin par ubhar aayaa hogaa
us ne ghabaraake nazar laakh bachaai hogii
mitake ik naqsh ne sau shaql dikhaai hogii
mez se jab merii tasviir hataai hogii
har taraf mujh ko tarraptaa huaa paayaa hogaa
bemahal hur baat pe jazbaat ubal aaye honge
Gam pashemaan tabassum men Dhal aaye honge
naam par mere jab aansuu nikal aaye honge
sar na kaandhe se sahailii ke uthaayaa hogaa
zulf zid kar ke kisii ne jo banaaii hogii
ruut jalvon pe Khizaan aur bhii chhaii hogii
barq ashqoon ne kai din giraii hogii
rang chehare pe kai roz na aayaa hogaa
haan … hoke majabuur mujhe us ne bhulaayaa hogaa
