one of my fav by AMJAD ISLAM AMJAD
Muhabbat Ous Ki Surat!
Piyasi Pankhri Ke Hont Ko Serab Karti Hai
Gulon Ki Aasteenon Mein Anokhe Rang Bharti Hai
Sahar Ke Jhutpute Mein Gungunati,Muskurati Hai
Muhabbat Ke Dinon Mein Dasht Bhi Mehsoos Hota Hai
Firdos Ki Surat
Muhabbat Ous Ki Surat!
Muhabbat Aber Ki Surat!
Dilon Ki Sarzameen Pe Ghir Ke Aati Aur Barasti Hai
Chaman Ka Zarra Zarra Jhoomta Hai ,Muskurata Hai
Azal Ki Benamu Matti Mein Sabza Sar Uthata Hai
Muhabbat Un Ko Bhi Aabad Aur Shadab Karti Hai
Jo Dil Hain Qaber Ki Surat
Muhabbat Aber Ki Surat!
Muhabbat Aag Ki Surat!
Bujhe Seenon Mein Jalti Hai To Dil Bedar Hote Hain
Muhabbat Ki Tapish Mein Kuch Ajab Israr Hote Hain
Keh Jitna Yeh Bharkti Hai ,Arooos-e-jan Mehkti Hai
Dilon Ke Sahilon Per Jama Hoti Aur Bikherti Hai
Muhabbat Jhag Ki Surat
Muhabbat Aag Ki Surat!
Muhabbat Khwab Ki Surat!
Nigahon Mein Uterti Hai Kisi Mehtab Ki Surat
Sitare Aarzoo Ke Is Tarha Se Jagmagate Hain
Keh Pehchani Nahin Jati Dil-e-betab Ki Surat
Muhabbat Ke Shajer Per Khawab Ke Panchi Uterte Hain
To Shakain Jag Uthti Hain
Thake Hare Sitare Jab Zameen Se Bat Karte Hain
To Kab Ki Muntazir Aankhon Mein
Shammain Jag Uthti Hain
Muhabbat Un Mein Jalti Hai Chiragh-e-Aab Ki Surat
Muhabbat Khawab Ki Surat!
Muhabbat Dard Ki Surat!
Guzashta Mosmon Ka Ista-Aara Ban Ke Rehti Hai
Yeh Sham-e-Hijer Mein Roshan Sitara Ban Ke Rehti Hai
Munderon Per Charaghon Ki Loen Jab Thartharati Hain
Nager Mein Na Umeedi Ki Hawain Sansanati Hain
Gali Mein Jab Koi Aahat Koi Saya Nahin Rehta
Dukhe Dil Ke Liay Jab Koi Bhi Dhoka Nahin Rehta
Ghamon Ke Bojh Se Jab Tootne Lagte Hain Shane To
Yeh Un Per Hath Rakhti Hai
Kisi Hamdard Ki Surat
Guzar Jate Hain Sare Qafle Jab Dil Ki Basti se
Faza Mein Terti Hai Der Tak
Yeh Gard Ki Surat
Muhabbat Dard Ki Surat!
**