Chalo yunhi sahi mera dil, dil nahee thaa
Wafa ka lahoo is mein shaamil nahee thaa
Yeh sachi muhabbat ka haamil nahee thaa
Tumhari parastish ke kaabil nahee thaa
Yeh behtar hai ab tum, mujhe bhool jao…
Ghazzab ki thee uff woh mulaqaat pehli
Jab ek kam-zuban se thee ki baat pehli
Woh halki si boondain woh barsaat pehli
Khuda jaanay kaisi thee woh raat pehli
Yeh behtar hai ab tum, mujhe bhool jao…
Dilon ko na madhosheyon mein dabootay
Woh jaam-e-muhabbat peyay hi na hotay
Khud apne kiye pe na istarha rotay
Na maazi ke matam mein yun waqt khotay
Yeh behtar hai ab tum, mujhe bhool jao…
Na dil chain paye tumhari bala se
Jo furqat sataye tumhari bala se
Ghatta ab jo chaaye tumhari bala se
Balaa mujh pe aaye tumhari bala se
Yeh behtar hai ab tum, mujhe bhool jao…
Muhabbat ke jhotay khaton ko jala do
Meri yaad tum lauh-e-dil se mitta do
Ab aansoo yeh kaisay, bhula do bhula do
Jo rona hai mujh ko inhee mein bahaa do
Yeh behtar hai ab tum, mujhe bhool jao…
Yeh behtar hai ab tum, mujhe bhool jao…
Yeh behtar hai ab tum, mujhe bhool jao…
