Chalo aaj se hum chahat ke zanda’an mein muqeed huwe
Teri yaad ke sehra mein dard-e-maazi ki wae’eed huwe
Chalo ab kitaab-e-zeest se awraaq-e-wafa palat’tay hain
Ke ab hum “wafa” ko jafa likhenge, saza likhenge
Ke ab hum apni bheegi January ki shur’ouaat
Tere bakshay huwe azaab-e-tanhai se kartay hain
Chalo ab teri muhabbat ki umer qaid muqaddar huwi
Ke hum ko wafa nibhanay ki saza tu milni thee
Chalo ab hum apne hathoon ki lakeeron se
Tera aks-e-jaan mita denge
Qalb-e-jaan mein saji tasveer-e-muhabbat
Shab ki tanhai mein chupke se hata denge
Is per bhi sehar koi gham nahe hota
Ke hum ko zamanay mein teri ruswai manzoor nahe
Shayad issi leye yeh lehja gham nahe hota
Magar jab faseel-e-jaan se saans ukharti hai tau
Aise mein hum aseer-e-muhabbat
Phir se ehad-e-wafa duhraanay lagtay hain
Itne zakhm khaa kar bhi
Nishtar jaan ko teri aankhoon ka
Surmaee samundar yaad aata hai
Aise mein hum dair tak mazar-e-muhabbat per
Noha girri kartay hain aahaain bhartay hain
Aise mein yaad-e-maazi ki har yaad
Nakhl-e-yaadan se mehev hojaati hai
Aise mein bas December ki
Siskiyaan leti huwi sard tareek yaad ka
Alvidaee manzar yaad aata hai
Aise mein humein tu bhi nahe teri chaahat bhi nahe
Bas woh muhabbat ka aakhri December yaad aata hai …
Haan bas woh aakhri December yaad aata hai …