*Muhabbat ki tabiyat meiN ye kaisa bachpana qudrat ne rakkha hai!
ke ye jitni purani jitni bhi mazboot ho jaye
ise tayeed-e-taaza ki zaroorat phir bhi rehti hai
yaqeen ki aakhiri hadd tak diloN meiN lehlehati ho!
nigahoN se tapakti ho, lahu meiN jagmagati ho!
hazaroN tarha ke dilkash, hasiN haale banati ho!
ise izhaar ke lafzoN ki hajat phir bhi rehti hai!
muhabbat maangti hai yuN gawahi apne hone ki
ke jaise tifl-e-sadah shaam k ik beej boye
aur shab meiN baraha utthey,
zamiN ko khod ke dekhe ke paudha ab kahan tak hai!
muhabbat ki tabiyat mein ajab takraar ki khu hai
ke ye iqraar ke lafzon ko sunne se nahiN thakti
bichadne ki ghaDi ho ya koyi milne ki sa’at ho
ise bas ek hi dhun hai
kaho- “mujhse muhabbat hai”
kaho- “mujhse muhabbat hai”
…tumhe mujhse muhabbat hai!
samandar se kahin gehri,sitaron se siva raushan
pahadoN ki tarah qayam, hawaoN ki tarah dayam
zamiN se aasmaN tak, jis qadar achche manazir haiN
muhabbat ke kinaye haiN, wafa ke hi sitare haiN
hamare haiN
hamare waaste ye chandani raateiN sanwarti haiN
sunehra din nikalta hai
muhabbat jis taraf jaye
zamana saath chalta hai!*