aadaab, dosto!
ek Ghazal pesh-e-Khidmat hai. hasb-e-maamuul, aap kii tavajjuh aur raae kaa taalib huuN.
Ghazal
**muddat ke baad aaye jo ham apne gaaoN meN
puuchho na, kitne Ghair mile aashnaaoN meN
maaNgii to maut bhii na milii, zindagii to duur
puurii hoN kyaa, asar hii na ho jab duaaoN meN!
kahte haiN jis ko ishq, ajab khel hai ki ham
saaraa jahaan haar gaye ek daaoN meN
seene ko apne cheer ke ham ne dikhaa diyaa
un ko abhii bhii shak hai hamaarii vafaaoN meN
dunyaa ke lutf aur inaayaat yaar kii
yaanii ki saarii umr kaTii intihaaoN meN!
sar par paRegii dhuup kaRii jab hayaat kii
so jaauuNgaa maiN tere KhayaaloN kii chhaaoN meN
lagtaa hai shahr meN koii tuufaan aayegaa
itnaa sukuut kyuuN hai yahaaN kii fazaaoN meN?
sab ko hai tere shahr meN daavaa Khudaaii kaa
insaan ek bhii na milaa in KhudaaoN meN
hotaa hamaare paas bhii uhdaa koii baRaa
hotii na gar zameer kii zanjeer paaoN meN
:Waseem: chiraaGh-e-raah mire paas dekh kar
kyaa josh aa gayaa hai achaanak havaaoN meN !!!**
Waseem Ahmed
:k:..