GumaaN aabad-e-hasti meiN wohi ik dhoop phaili he
beham degar ulajhtey, phailtey, bikhartey sawalooN ki!
magar abr-e-yaqeeN ka khushnuma saya
nah pehley tha__ nah ab uski
koyi aahat
kissi bhi samat sey a’awaaz deti he
kissi ki chup sawalooN ko naye a’aghaaz deti he
samandar ki tehooN meiN jo safeeney anginat saddiyooN
sey dobey haiN
woh kiss ko yaad kartey haiN!
jo pani unkey malbey ka imanatdaar thehra tha
unheeN kaisey bulata he!
hawa ujhrhey makanooN key dareechooN sey guzarti he
to keya mehsoos karti he
azal keya he!
agar woh he to us sey qabal ki taqweem kaisi thi!
abad key jis kinarey ki taraf apney ta’aeeN
hum sab rawana haiN
kahan he woh?
agar woh he to us key baad ki tafheem kaisey ho!
buhat mumkin he jo chezeeN bazahir ban’ney wali haiN
kabhi ki ban chuki hooN
our mustaqbil
faqat ik khwaab ho, jo khwaab ki tajseem lagta he!!!
zameeN ab tak hazarooN martaba bas bas key ujhrhi he
keh pehli baar yeh is khail ka kirdaar thehri he?
yeh neela a’asmaaN
jo ik hisaar-e-bea’amaaN ki misl charooN our phela he
agar ik asta’ara he kissi ki bekarani ka!
to phir is mushat-e- khaki ki
basat-e-justuju keya he?
zameenzadooN ki qismat meiN agar mitti hi likhi thi?
to phir yeh haohuu keya he???
zameeN ki baat nikli he to yaad aya
yeh jitney fasley haiN
aadmi our aadmi key darmiyaaN
unki musafat meiN lahoo jitna bhi bhikhra he
dil-e-aadam sey nikla he
yeh jitni sarhadeeN haiN
zor-o-zar, rang-o-nasab, faz-o-tamaddun ki
inheeN khud aadmi ney apney girda gird khaincha he
yeh jitney tafarqey halaat key pairhooN pe ugtey haiN
sabhi ko is chaman key maliyooN ney aap saincha he
hawas key ik musalisal khwaab ki ta’abeer he dunia
jissey tareekh kehtey haiN
yeh taqatwarooN key zulm key qissoN ka malba he
gulamooN our kaneezooN key kaheeN bazaar lagtey haiN
saggey baitooN ki aankhooN meiN sulayaaN phairi jati haiN hawas meiN takht-e-shahi ki
baradar our baradarzadgaaN dushman thehrtey haiN
khud apney hathooN sey gardan urha daitey haiN
usko bhi
keh jiska lahoo hotey haiN
her ik rishtey ha halqa eik pal meiN toot jata he
magar phir bhi
mua’arrah __ aman, sukh our chain likhta he
(keh aakhir us mua’arrakh ko bhi kochh din our jeena tha)
darindooN sey bharey jungal ki ik tasveer he duniya
makanooN sey bhari in bastiooN ko ghour sey dekha
to yeh keerhey makorhooN ki
panahgahooN sey baddtar theeN
koyi darwaza khulta he
to jaisey cheekh si koyi fiza meiN phail jati he
gali kochooN meiN chaltey haiN to wehshat sath chalti he
karaheeN
qehqahooN ki goonj meiN a’amaiz hoti haiN
to sab chehrey
ajab bechehrgi ka dilshikan manzar banatey hain
kissi pehchan ki dhun meiN
yeh jab a’adaad ki sorat meiN dhaltey haiN
nah in key naam rehety hain nah in key naqsh bantey haiN
shikam ki bhook ki khatir badan nelaam hotey haiN
our is key baad ruuhooN tak yeh qabza phail jata he
phir aisi raat parhti he
keh aankhooN meiN sehar to keya
sehar key khwaab tak baqi naheeN rehtey
-A.I.Amjad
appi i missed u suchi 
Bohat khoobsoorat nazm hey jo aap ney post ki hey:k: Hope you won’t disappear now:)