*Mohabbat ki tabeeyat mein
Yeh kaisa bachpana qudrat ne rakha hai
Ke jitni puraani jitni bhi mazboot ho jaye
Issey taeed-e-taaza ki zaroorat phir bhi rehti hai
Yaqeen ki aakhri hadd tak dilon mein lehlahaati ho
Nigaahon se tapakti ho, lahuu mein jagmagaati ho
Hazaaron tarah se dilkash haseen haale banati ho
Ussey izhaar ke lafzon ki haajat phir bhi rehti hai
Mohabbat maangti hai yun gawahi apney honey ki
Ke jaise tifl-e-sadaa shaam ko ek biij boye
Aur shab meinbauraa uthey
Zameen ko khod kar dekhey
Ke paudaa ab kahan tak hai
Mohabbat ki tabeeyat mein ajab takraar ki khuu hai
Ke yeh iqraar ke lafzon ko sun’ney se nahin thakti
Bikharney ki ghari ho ya koi milne ki sa’at ho
Issey bas ek hi dhun hai
Kaho mujhse mohabbat hai
Kaho mujhse mohabbat hai
Kuch aisi bey-sukooni hai wafa ki sar-zameenon mein
Ke jo ahl-e-mohabbat ko sadaa bechain rakhti hai
Ke jaise phool mein khushboo ke jaise haath mein taara
Ke jaise shaam ka taara
Mohabbat karne walon ki sehar raaton mein rehti hai
Gumnaam ki shaakhon mein aashiyaan bantaa hai ulfat hai
Yeh ain wisaal mein bhi hijr ke khadson mein rehti hai
Mohabbat ke musafir zindagi jab kaat chuktey hain
Thakkan ki kirchiyan chuntey wafa ki ajrakein pehney
Samay ki rehguzar ki aakhri sarhad pe ruktey hain
To koi doobti saanson ki dori thaam kar
Dheere se kehta hai
Ke yeh sach hai na
Hamari zindagi ek doosrey ke naamlikhi thi
Dhundhlaaka sa jo aankhon se qareeb-o-door hai phailaa hai
Issi ka naam chahat hai
Tumhein mujhse mohabbat thi
Tumhein mujhse mohabbat hai
Mohabbat ki tabeeyat mein
Yeh kaisa bachpana qudrat ne rakha hai*
by Amjad Islam Amjad
very nice and thanks for sharing:flower1:
