khushi hai yeh aaney ki barsaat key
piyein baadah-e-naab aur aam khaaein
sar-e-aaghaaz-e-mausam mein andhey hein hum
key dilli kou chorein aur lohaaru kou jaaein
sou anaaj key jou hai matlub-e-jaanan
naa waan aam paaein, naa angur paaein
huaa hukm baawarchiyon kou key haan
abhi jaa key poochou key kal kiya pakaaein
woh khattey kahan paaein imli key phool
woh karvey kareley kahan sey mangaaein
faqat gosht so bhaiR kaa, resha-daar
kaho uss kou kiya khaa key hum haz uthaaein
Re: Mirza Ghalib aur aam
sardiyon main bhi aam?
PS: nice sharing.. Ghalib bhi ander se Mulla hi nikla 
Re: Mirza Ghalib aur aam
lol, yeh shayari hi is mausam mein mili hai…
Re: Mirza Ghalib aur aam
kia aam bhi udhar ke?
Re: Mirza Ghalib aur aam
aam tou yahan faraawani se nahin miltey, aanan fanan ghayab hou jaatey hein, udhar ke kiya milein gai…
Re: Mirza Ghalib aur aam
lolz…kis kaa kalaam hai?
Re: Mirza Ghalib aur aam
^^ ghalib kaa, un key aik letter mein thaa, matric mein parhaa thaa, shayari achi thi si liye note kar li thi…
Re: Mirza Ghalib aur aam
zabaan o bayaan o andaaz se to Ghalib kaa kalaam nahiiN lagtaa…ab dekhiye aam kii madHa meN yeh kalaam-e-Ghalib aur donoN ke maa_bai’n farq dekhiye aur Khud faisla kijiye:
**
haaN dil-e-dardmaNd zam-zamah saaz
kyuN na kholey dar-e-khazina-e-raaz
khaame ka safhey par rawaaN hona
shaakh-e-gul ka hai gul-fishaaN hona
mujh se kyaa puuchtaa hai kya likhiye
nukta haaye khirad fazaa likhiye
baare, aamoN ka kuch bayaaN ho jaay
khaama-e-nakhl rutab-fishaaN ho jaay
aam kaa kaun mard-e-maidaaN hai
samar-o-shaakh, guey-o-chogaaN hai
taak ke jee meiN kyuN rahey armaaN
aaye, ye guey aur ye maidaaN!
aam ke aagey pesh jaave khaak
phoDta hai jaley phapholey taak
na chalaa jab kisee tarah maqdoor
baadaa-e-naab ban gayaa angoor
ye bhi naachaar jee kaa khona hai
sharm se paani paani hona hai
mujhsey pucho, tumheN khabar kya hai
aam ke aagey neyshakar kya hai
na gul us meiN, na shaakh-o-barg, na baar
jab khizaaN aaye tab ho us ki bahaar
aur dauDaayiye qiyaas kahaaN
jaan-e-sheeriN meiN ye miTThaas kahaaN
jaan meiN hoti gar ye sheerini
koh-kan baa-wajud-e-gham_geeni
jaan deney meiN is ko yakta jaan
par woh yuN sahl dey na sakta jaan
nazr aata hai yuN mujhe ye samar
key dawakhaana-e-azal meiN makar
aatish-e-gul pey qand kaa hai qiwaam
sheerey key taar kaa hai resha naam
yaa yeh hoga key furT-e-raafat sey
baagh-baanoN ney baagh-e-jannat sey
angabeeN key, ba hukm-e-rabb’in-naas
bhar ke bhejey haiN sar ba muhr gilaas
yaa lagaa kar khizar ney shaakh-e-nabaat
muddatoN tak diyaa hai aab-e-hayaat
tab huwaa hai samar fishaaN yeh nakhl
ham kahaN aur kahaaN ye nakhl
tha turanj-e-zar eyk, khusru paas
rang ka zard, par kahaaN buu-baas?
aam ko dekhtaa agar ik baar
pheynk detaa tilaa-e-dast afshaar
raunaq-e-kaargaah-e-barg-o-nawaa
naazish-e-duudmaan-e-aab-o-hawaa
rahraw-e-raah-e-khuld kaa toshaa
tuuba-o-sidrah kaa jigar goshaa
sahib-e-shaakh-o-barg-o-baar hai aam
naaz-e-parwardah-e-bahaar hai aam
khaas wo aam jo na arzaaN ho
jo bar-e-nakhl-e-baagh-e-sulTaaN ho
woh key hai waali-e-wilaayat-e-ahd
adl sey uskey hai Himaayat-e-ahd
fakhr-e-deeN `izz-o-shaan-e-jaah-o-jalaal
zeenat-teenat-o-jamaal-o-kamaal
kaar-farmaa-e-deen-o-daulat-o-bakht
chehra-araa-e-taajmand-o-takht
saayah uska hamaara saayah hai
khalq par; woh khudaa ka saayah hai
ay mufeez-e-wujud-e-saayah-o-nuur
jab talak hai namuud-e-saayah-o-nuur
us khudawand-e-bandah-parwar ko
waris-e-ganj-o-takht-o-afsar ko
shaad-o-dilshaad-o-shaadmaaN rakhiyo
aur ghalib pey mehrbaaN rakhiyo **
Re: Mirza Ghalib aur aam
^^ yes jab nisaab mein parhaa thaa tou laga thaa ke ghalib ka nahin lagta, but kai saal pehle radio par bhi sunaa tha, host ney kuch letters parh kar sunaye thay ghalib ke, woh letter poora find karun gaa time milaa tou…
Re: Mirza Ghalib aur aam
Aam se yaad aya
pocha jo mein ne aik rehRi baan se..ke aam langRay hain?
kehne laga ..langRay hain to rehRi par Dalay hain na