******sabaq aisaa paRhaa diyaa tu ne
dil se sab kuchh bhulaa diya tuu ne
ham nikamme hue zamaane ke
kaam aisaa sikhaa diyaa tuu ne
laakh dene ka ek denaa hai
dil-e-be-mudda’a diyaa tu ne
be talab jo milaa, milaa mujhko
be Gharaz jo diyaa, diyaa tuu ne
umr-e-jaaved, Khizr ko bakhshii
aab-e-haivaaN pilaa diyaa tuu ne
naar-e-namrood ko, kiyaa gulzaar
dost ko yuuN bachaa liyaa tu ne
Daagh ko kaun dene waala thaa
jo diya, aye Khuda! diyaa tuu ne******