Mire Ehad Ke Hassino
Voh sitaare jin ki Khatir kai beqaraar sadiaaN
meri teerabaKht dunya meN sitaaravaar jageeN
kabhi rif'atoN pe lapkiN, kabhi vas'atoN se uljheeN
kabhi sogvaar soeeN, kabhi naghma-baar jageeN
voh bulland-baam taare, voh falak-m'qaam taare
voh nishaan de ke apnaa, rahe be-nishaaN hamesha
voh haseeN, voh noor-zaade, voh Kh'la ke shaah-zaade
jo hamaari qismtoN pe rahe hukm'raaN hamesha
jinheN muz'm'hil diloN ne abdi-p'naah jaanaa
thake haare qaafiloN ne jinheN Khiz're raah jaanaa
jinheN kamsinoN ne chaaha ki lapak ke pyaar kar leN
jinheN mehvishoN neN maaNga ki gale ka haar kar leN
jinheN aashiqoN neN chaaha ki falak se toR laaeN
kisi raah meN bicchaaeN, kisi sej par sajaaeN
jinheN butgaroN ne chaaha ki sanam bana ke poojeN
yeh jo door ke haseeN heN inheN paas la ke poojeN
jinheN mutriboN ne chaaha ki s'daaoN meiN pro leN
jinheN shaayroN ne chaaha ki Khyaal meiN samo leN
jo hazaar koshishoN par bhi shumaar meiN na aaye
kabhi Khaak-e-be-b'zaa'at ke dyaar meiN na aaye
jo hamaari dastras se rahe door door ab tak
hameN dekhte rahe heN jo ba'sad gharoor ab tak
mere ehad ke hasino! voh nazar-n'vaaz taare
mera daur-e-ishaq-parvar tumheN nazar de raha hai
voh janooN jo aab-o-aatish ko aseer kar chuka thaa
voh Kh'la ki vas'aatoN se bhi Khiraaj le raha hai
mere saath rehne vaalo! mere baad aane vaalo
mere daur ka ye tohfa tumheN saaz gaar aae
kabhi tum Kh'la se guzro kisi seem tan ki Khatir
kabhi tum ko dil meN rakh kar koi gul'azaar aae
