~ Assalam O’ Alaiekum ~
August ki 24 tareekh mere leye is leye eham hai ke yeh tareekh duniya mein meri aamad ka sabab bani … In guzre huwe saaloon mein kabhi tu aisaa bhi huwa ke is tareekh ko yaad rakhne wale ne is tarah yaad rakha jaise woh is tareekh ke ane ke intezaar mein din gin gin kar guzar raha thaa, kabhi yun bhi hota thaa ke raat ke 12 bajte hi mubarakbaad ke telephone aya karte thay tu kabhi mubarakbaad ka zareya messages huwa karte thay… magar kya faani ko bhi kabhi lafaani ka darjaah haasil ho saka hai … ? umer ke guzarte in saaloon mein wakt ki taiz lehroon ne sab kuch hi badal dala… ya yun kaheyey raakh kar daala…
Aah… aise ujaar safar mein kaun mere dukh baant’ne ko mere saath chalay… yahaan tu hawa ke sehme huwe jhonkay bhi dabay paoon utarte aur chup chaap guzarte hain… yahaan kaun mere majroh jazboo per dilasoon ke ‘phaye’ rakhay… kis mein itna hausla ke meri rou’daad sunay… afsoos koi nahee… koi nahee siwaye meri sakht jaan tanhaee ke… Tanhaee … jo meri khali hatheleyoon per qismat ki lakeer ki tarah sabt hai… mere ratjagoon ki gham’gusar aur meri thakan se choor aankhon mein… neend ki tarha bhar gaee hai…
Aaj yeh 24 tareekh apne sath kaee beeti yadain lekar ek baar phir aagaee hai … aur shayad mujhe yeh yaad dila rahi hai ke jab duniya mein teri aamad huwi thee tu teri aankh mein aansoo thay … aaj yeh 24 tareekh shayad dobara un aanso’oun ko apne sang le aee hai…
Mohsin Naqvi ki is pur’assar magar taweel nazm jis ka unwaan unhoon ne Salgirah rakha hai ka kuch selection aap sab ki nazar hai … !
Zindagi… taiz bahut taiz hawa ka jhonka
Jalti bhujti huwi sham’ain mein mah-o-saal mere
Dhalta suraj mere maazi ke lehad ka qutba
Raig-e-sehra ki lakeerain hain khad’o’khal mere
Aaj ki shaam, ke har saal issi shaam ke saath
Meri ukhri huwi saansoon mein girah lagti hai
Aasmaan wakt ke aanchal ki dhanak bunta hai
Saari dharti tan-e-arreyaan ki zirrah lagti hai
Aaj ki shaam ke har saal mere zakhm nawaz
Muskurate huwe kuch phool ata karte hain
Kuch maseha meri khaatir mera dil rakhne ko
Khat mein jeene ki dua bhi diya karte hain
Saal-ha-saal guzarne pe bhi ay dil zadgaan
Aaj ki shaam manate huwe dar lagta hai
Muskurate huwe chehroon ke bhanwar hain lekin
Aakhri shamma jalate huwe dar lagta hai
Dil dharakta hai ke jalti huwi sham’oun ka dhuwaan
Shoula-e-karb mein thehleel na hojaye kaheen
Ji larazta hai ke manzar ke adhore pan ki
Aaj ki shaam se takmeel na hojaye kaheen
Aao kuch dair ko hum zakhm shumari kar lain
Aur kuch dair mein har shamma phighal jayegi
Aaj ki bazm mein khoo jayain kaheen so jayain
Aaj ki shaam bhi kuch dhair mein dhal jaayegi
Jalti bhujti huwi sham’oun ka bharosa kya hai
Zindagi.. taiz bahut taiz hawa ka jhonka …
Zindagi ka kya bharosa, kaun jane mujhe agli 24 tarekh dekhna hi naseeb na ho…
