Meri chashm-e-khushk main rat jagay ka dia na ban kay jala karo
Isey aansoun se nawaaz do, mera zakhm zakhm hara karo
Jo ayan khuloos ki leher hai, ye gharaz fareib ka zeher hai
“Ye naey mizaaj ka sheher hai zara faasle se mila karo”
Chalo jo tumhaara usool hai, dil o jaan se hamko qubool hai
Ye jafa tumhari sarisht hai, to jafaaon pe bhi jafa karo
Main kisi ka aks-e-jamaal hoon, main vujud hoon keh khayal hoon
Mujhe apni koi khabar miley, mujhe aa’ine se reha karo
Na yeh zo’am hai, na futoor hai, ye chalan hi mera ghuroor hai
Mujhe kya jhukaaoge meh-vasho, jo haseen ho to hua karo
Ye meri shanaakht ka lafz hai, magar ajnabi ki si tarz hai
Isey martaba miley naam ka, isey in labon se ada karo
Jo nahi woh waqt to kya hua kisi bhi firaun ka khauf kya
Keh tumhaaray hath qalam to hai, so isi se kaar-e-asa karo