Meray tan kay zakhm na gin abhee
Meri aaknh may abhee noor hay
Meray baazuoon pay nigaah kur
Jo ghuroor tha Woh ghuroor hay
Abhee taazadum hay mera faras
Naay ma’arka’aun pay tula hua
Abhee razmgaah kay durmiaan
Hay mera nishaan khula hua
Teri chashm-e-bad say raheen nihaan
Woh tahein jo hain meri zaat ki
Mujhay dekh, qubza-e-taygh par
Hay girift abhee meray haath ki
Woh jo dast-e-jaan ko chaman karay
Yeh sharf to meray lahoo ka hay
Mujhay zindagee say aziztar
yeh jo khel taigh o gulou ka hay
Tujhay maan joshan o guraz par
Mera harf-e-huq meri dhaal hay
Tera joor o zulm bhala sahee
Mera hosla bhee kamaal hay
Main isi qabeelay ka fard hooon
Jisay naaz Sidq-o-Yaqeen pay hay
YEH NAAMA BAR HAY BAHAR KA
JO GULAAB MERI JABEEN PUR HAY