Yeh roshnee kay ta’aqqub main bhagta hooa din
Jo thak gaya hai to ab is ko mukhtasar kar day
Maen zindagi kee duaa mangnay laga hoon bohot
Jo ho sakay to duaaon ko bay asar kar day
Sitara-e-sehree doobnay ko aya hai
Zara koi meray sooraj ko bakhabar kar day
Meree zameen, mera aakhree havalah hai
So maen rahoon na rahoon is ko barvar kar day
Maen apnay khwab say kat kar jeeyoon to meray Khuda
Ujaar day meree mittee ko darbadar kar day
by
iftikhar arif
