Apni khaatir jagay ho, soye ho
apni khaatir hansay ho, roye ho
kiss liyah aaj khoye khoye ho
tum nay aansoo bohat piye apnay
tum bohat saal rah liyah apnay
ab meray sirf meray hokar raho
husn hi husn ho, zahanat ho
ishq hoon main tou, tum mohabbat ho
tum meri bus meri amanat ho
ji liyah jiss qadar jiye apnay
tum bohat saal rah liye apnay
ab meray sirf meray hokar raho
rahtay ho ranj o ghum kay gheron main
dukh kay aasaib kay baseron main
kaisay choroon tumhain andheron main
tum ko day doonga sab diye apnay
tum bohat saal rah liye apnay
ab meray sirf meray hokar raho
tum azal sey dukhon kay dheray ho
chahay khud ko ghamon sey ghairay ho
jab sey paida huay ho meray ho
aaj kholain gay lab siye apnay
tum bohat saal rah liye apnay
ab meray sirf meray hokar raho
ab mujhay apnay dard sahnay do
dil ki har baat dil sey kahnay do
meri banhon main khud ko bahnay do
muddaton zakham khud siye apnay
tum bohat saal rah liye apnay
ab meray sirf meray hokar raho!!
-Wasi Shah~
