Mera maazi
Meri tanhai ka yea andha shigaaf
Yea ke saanson ki tarah mere sath chalta raha
Jo meri nabz ki maanind mere saath jiya
Jis ko aate huwe jaate huwe be-shumaar lamhe
Apni sanglaakh ungliyon se gehra karte rahe, karte gaye
Kisi ki Oak pa lene ko lahuu bahta raha
Kisi ko ham-nafas kahne ki justuju main raha
Koi to ho jo be-saakhta is ko pehchane
TaRap ke palte, achanak isay pukar utthe
Mere ham-shaakh
Mere ham-shaaKh meri udasion ke hissedar
Mere adhoore pan ke dost
Tamam zakhm jo tere hain,
Mere dard tamaam
Teri karrah ka rishta hai meri Aahon se
Tuu ek masjid-e-weeran hai, main teri azaan
Azaan jo apni hi viraangi se takkra kar
Dhakki chuppi hui beWaa zameen ke daaman par
PaRhe namaaz Khuda jaane kis ko sajjda kare.
—