**KahaN tha itna aazaab-aashna mera chehra!
jale chiraag to bujhne laga, mera Chehra
wo tere hijr ke din wo safeer sadiyoN ke
tu un dinoon mein kabhi dekhta mera chehra
judaiyoN ke safar meiN rahe heiN saath sada
teri talaash, zamane, hawa, mera chehra
mere siwa koi itna udaas bhi to na tha
khizaaN ke chaand ko acha laga mera chehra
kitaab khol raha tha wo apne maazi Ki
warq warq pe bikharta gaya mera chehra
sehar ke Noor se dhulti hui teri aaNkheiN
safar ke gard mein lipta hua mera chehra
hawa ka aakhri boosa tha ya qayamat thi!
badan ke shaakh se phir gir parra mera chehra
yeh log kiuN mujhe pehchante nahi Mohsin
meiN sochta hooN kahaaN reh gaya mera chehra!
___________
Mohsin Naqvi
**
