**Deep jis ka sirf mehellaat hi meiN jalay,
chand logon ki khushyon ko lay ker chalay,
wo jo saye main har maslihat kay palay;
aesay dastoor ko,
subh-e-bey-noor ko,
meiN naheiN maanta,
meiN naheiN jaanta!
MeiN bhi kha’if naheiN takhta-e-daar sey,
meiN bhee Mansoor hoon, keh do aghyaar sey,
kiuN daraatay ho zindaan ki divar say,
zulm ki baat ko,
jehel ki raat ko,
meiN naheiN maanta,
meiN naheiN jaanta!
Phool shaakhon pay khilnay lagay, tum kaho,
jaam rindon ko milnay lagay, tum kaho,
chak seenon kay silnay lagay, tum kaho,
is khulay jhoot ko,
zehan ki loot ko,
meiN naheiN maanta,
meiN naheiN jaanta!
Tum nay loota hai sadyon hamara sakooN,
ab na hum per chalay ga tumhara fasooN,
chara-gar meiN tumheiN kis tarah sey kahooN!
tum naheiN charaagar,
koi maaney magar,
meiN naheiN maanta,
meiN naheiN jaanta!**
Habib Jalib
